ԵՐԵՎԱՆ, 17 նոյեմբերի – Sputnik. Կրեմլը դեռ չգիտի` արդյոք ՀՀ վարչապետ Նիկոլ Փաշինյանը մտադիր է մասնակցել ԵԱՏՄ–ի և ԱՊՀ–ի հանդիպումներին, որոնք պետք է անցնեն Սանկտ Պետերբուրգում տարեվերջին, սակայն այնտեղ հրավիրվել են բոլորը։ Այս մասին հայտարարել է ՌԴ նախագահի մամուլի քարտուղար Դմիտրի Պեսկովը։
«Դեռ չգիտենք, բոլորը հրավիրված են... Հայկական կողմը քաջատեղյակ է, որ բոլորը հրավիրվել են», – ասել է Պեսկովը լրագրողներին։
Հիշեցնենք` վերջին ամիսներին փորձագետները հայ-ռուսական հարաբերությունների շարունակական վատթարացում են արձանագրում։ Հայաստանը չմասնակցեց ՀԱՊԿ զորավարժություններին, հրաժարվեց այդ կազմակերպության գլխավոր քարտուղարի տեղակալի քվոտայից, սակայն համատեղ զորավարժություններ անցկացրեց ՆԱՏՕ-ի հետ։
ՀՀ վարչապետ Նիկոլ Փաշինյանը և արտգործնախարար Արարատ Միրզոյանը չէին մասնակցել նաև ԱՊՀ գագաթնաժողովին, որը հոկտեմբերին կազմակերպվել էր Բիշքեկում, իսկ ՀՀ անվտանգության խորհրդի քարտուղար Արմեն Գրիգորյանը նոյեմբերին չէր մասնակցել ԱՊՀ մասնակից պետությունների անվտանգության խորհուրդների քարտուղարների մոսկովյան հանդիպմանը։