ԵՐԵՎԱՆ, 15 նոյեմբերի – Sputnik․ Երևանի Կոնդ թաղամասի վերակառուցման ծրագիրը գործնական ընթացք է ստացել: «Ֆեյսբուքի» պաշտոնական էջում այս մասին գրել է Երևանի քաղաքապետ Տիգրան Ավինյանը։
«Մեր նպատակն այսօր կոնդեցիների կողմից տարիներով տիրապետած տարածքների սեփականության իրավունքի գրանցումն ու կառուցապատման ծրագիր իրականացնելու ժամանակ կառուցապատողի, օտարողի հետ սեփականության իրավունքների խախտման վերաբերյալ հնարավոր խնդիրների բացառումն է»,- գրել է Ավինյանը։
Նրա տեղեկացմամբ՝ գույքի օրինականացման համար արդեն իսկ քաղաքապետարան է մուտքագրվել 167 դիմում:
Կոնդի բնակիչների հետ քննարկվել են նաև թաղամասի վերակառուցման հայեցակարգի հետ կապված հարցեր:
Քաղաքապետը շեշտում է, որ նախագծի հիմքում մեկ նպատակ է՝ պահպանել պատմական թաղամասի ինքնատիպ կոլորիտը, համատեղել քաղաքային միջավայրի նորն ու ավանդականը:
Ավելի վաղ հայտնել էինք, որ «Երևաննախագիծ» ընկերության և Լիոնի քաղաքապետարանի՝ Կոնդի վերակառուցման ժամանակին մշակած նախագիծը գործնական փուլ կթևակոխի։
Հիշեցնենք, որ Կոնդի վերակառուցման համար մրցույթ է հայտարարվել դեռ 2021-ին։