ԵՐԵՎԱՆ, 14 նոյեմբերի - Sputnik. Տիգրան Պարսիլյանն ու ՀՀ երկրորդ նախագահ Ռոբերտ Քոչարյանի որդին՝ Լևոն Քոչարյանը, Ազգային ժողովում երդվեցին՝ անցնելով պատգամավորական լիազորությունների կատարմանը։
«Երդվում եմ բարեխղճորեն կատարել ժողովրդի առջև ունեցած պարտավորություններս, պահպանել ՀՀ Սահմանադրությունն ու օրենքները, նպաստել ՀՀ ինքնիշխանությանն ու շահերի պահպանմանը։ Անել ամեն ինչ քաղաքացիական համերաշխության, համամարդկային արժեքների պահպանման համար»,–երդվեցին պատգամավորները։
Տիգրան Պարսիլյանը լրացրեց ԱԺ «Քաղաքացինական պայմանագիր» խմբակցության, Լևոն Քոչարյանը՝ «Հայաստան» խմբակցության շարքերը։
ՔՊ ցուցակից պատգամավորական տեղը թափուր էր մնացել Մաթևոս Ասատրյանի մահվան պատճառով, իսկ «Հայաստան» խմբակցությունում տեղ էր ազատվել, երբ Արմեն Չարչյանը վայր էր դրել մանդատը, իսկ նախընտրական ցուցակով հերթական համարներ, պատգամավորի թեկնածուներ Միհրդատ Մադաթյանը, Անժելա Նալբանդյանը և Գերասիմ Վարդանյանը ինքնաբացարկի դիմումներ էին ներկայացրել: Ընտրական ցուցակի հերթական հաջորդ թեկնածուն Լևոն Քոչարյանն էր։
Կենտրոնական ընտրական հանձնաժողովի որոշմամբ նոյեմբերի 6–ին Քոչարյանը ԱԺ «Հայաստան» խմբակցությունից մանդատ ստացավ, ապա ազատ արձակվեց կալանավայրից։
Լևոն Քոչարյանին մեղադրանք է առաջադրվել այն մասով, որ սեպտեմբերի 22-ին խաղաղ ցույցի ժամանակ նա չի կատարել կարմիրբերետավորների` ճանապարհը բացելու օրինական պահանջը և բռնություն է գործադրել ոստիկանության ծառայողների նկատմամբ, այնինչ նույն օրը Լևոն Քոչարյանին բերման ենթարկելիս իրավապահները այնպես են հարվածել նրան, որ փակ գանգուղեղային վնասվածք է ստացել։