ՀՀ ԱԺ–ն 2–րդ ընթերցմամբ և ամբողջությամբ ընդունեց մի շարք օրենսդրական փոփոխություններ

ԵՐԵՎԱՆ, 14 նոյեմբերի – Sputnik. ՀՀ Ազգային ժողովն այսօր 2–րդ ընթերցմամբ քննարկեց և ամբողջությամբ ընդունեց մի շարք օրինագծեր։

58 կողմ, 21 դեմ, 3 ձեռնպահ ձայներով ամբողջությամբ ընդունվեց «Հակակոռուպցիոն կոմիտեի մասին» ՀՀ օրենքում փոփոխություններ կատարելու մասին նախագիծը։ Այսպիսով, ըստ նախագծի հեղինակ ՀՀ կառավարության` Հակակոռուպցիոն կոմիտեում կապահովվի առավել բանիմաց և հմուտ մասնագետների ընտրություն, առավել արդյունավետ կիրականացվի թափուր պաշտոնների համար անցկացվող մրցույթը, ինչպես նաև հնարավորություն կընձեռվի առանց ֆիզիկական պատրաստականության պահանջի ընտրելու օպերատիվ ստորաբաժանման այնպիսի ծառայողների, որոնք տեղեկատվական տեխնոլոգիաների, տնտեսագիտության և այլ բնագավառներում ունեն հատուկ մասնագիտական գիտելիքներ և հմտություններ:

56 կողմ, 24 ձեռնպահ, 0 դեմ ձայներով 2–րդ ընթերցմամբ և ամբողջովին ընդունվեց նաև «Վարչական իրավախախտումների մասին» և «Նյութական պահուստի մասին» ՀՀ օրենքներում փոփոխություններ կատարելու մասին փաթեթը։

Այսպիսով, պատասխանատվության կենթարկվեն ռազմավարական պաշարների պահուստի, նյութական արժեքների պահպանումն իրականացնող կազմակերպությունները ռազմավարական պաշարների պահուստի անվանացանկում ներառված ապրանքների վերաբերյալ ՀՀ կառավարության սահմանած ձևի հաշվետվությունները նյութական պահուստի պահպանման և սպասարկման ոլորտի լիազոր մարմնի սահմանված ժամկետներում կամ կարգով չներկայացնելու դեպքում։

57 կողմ, 0 դեմ, 25 ձեռնպահ ձայներով 2–րդ ընթերցմամբ և ամբողջությամբ ընդունվեց նաև «Երևան քաղաքում տեղական ինքնակառավարման մարմինների մասին» ՀՀ օրենքի փոփոխությունները։ Այսուհետև Երևանի քաղաքապետի և ավագանու իրավական ակտերը կներկայացվեն լիազոր մարմին՝ նաև նորմատիվ իրավական ակտերի հրապարակման միասնական կայքում հրապարակվելու համար:

Քվեարկության դրվեցին նաև մի շարք նախագծերի 2–րդ ընթերցմամբ քննարկումները հատուկ` 24–ժամյա ռեժիմով քննարկելու որոշումները, որոնք ընդունվեցին։