ԵՐԵՎԱՆ, 13 նոյեմբերի – Sputnik․ Երևանի ավագանու «Ազգային առաջընթաց» խմբակցության նախաձեռնությամբ հանրային լսումներ են անցկացվել բնապահպանական ու կանաչապատման խնդիրների վերաբերյալ։ Այս մասին ֆեյսբուքյան իր էջում հայտնել է Երևանի նախկին քաղաքապետ, այժմ Երևանի ավագանու անդամ Հայկ Մարությանը։
«Ավագանու մեր խմբակցությունն ակտիվ աշխատանք է սկսել Երեւանի կառավարման տարբեր ոլորտներում իր վերահսկողական գործառույթն իրականացնելու ուղղությամբ»,- գրել է Մարությանը։
Նա նշել է, որ հանրային լսումներին մասնակցել են համապատասխան ոլորտների գիտնականներ, մասնագետներ, հանրային գործիչներ։ Քննարկման առանցքում են եղել Երևանում ծառերի փոխարինման օրինականությունն ու արդյունավետությունը։
«Մենք հետևողական ենք լինելու և թույլ չենք տալու, որ ոչ կոմպետենտ կառավարմամբ վնաս հասցնեն մեր քաղաքին»,- գրել է Մարությանը։
Նրա խոսքով՝ քննարկմանը հրավիրել են նաև քաղաքային իշխանության ներկայացուցիչներին, սակայն նրանք չեն եկել։
Ըստ Մարությանի` առաջիկայում նմանատիպ քննարկումներ են սպասվում քաղաքային բյուջեի, քաղաքաշինության, տրանսպորտի ու մի շարք այլ թեմաներով։