ԵՐԵՎԱՆ, 13 նոյեմբերի – Sputnik. Հունգարիան հավանություն չի տվել Կիևին զենքի համար 500 միլիոն եվրոյի հատկացմանը խաղաղության եվրոպական հիմնադրամից, քանի որ կոռուպցիայի հակազդման ուկրաինական ազգային գործակալությունից հունգարական ընկերությունները պատերազմի միջազգային հովանավորների ցուցակում չընդգրկելու երաշխիքներ չի ստացել: Տեղեկությունը հայտնում է Հունգարիայի ԱԳՆ ղեկավար Պետեր Սիյարտոն, որի խոսքերը մեջբերում է ՌԻԱ Նովոստին։
Սիյարտոն հայտնել է, որ այսօրվա նիստում Հունգարիայի վրա կրկին մեծ ճնշում է գործադրվել, որ ստիպեն Բուդապեշտին հավանություն տալ Ուկրաինային զենք մատակարարելու համար խաղաղության եվրոպական հիմնադրամից 500 միլիոն եվրոյի վճարմանը:
«Բնականաբար, այսօր էլ չհամաձայնեցի, մենք նախկինի պես մեր դիրքորոշումն ունենք, քանի դեռ Կոռուպցիայի հակազդման ուկրաինական ազգային գործակալությունից երաշխիքներ չենք ստացել, որ երբեք չի կրկնվի ОТР բանկի կամ հունգարական որևէ այլ ձեռնարկության մտացածին պատճառներով պատերազմի միջազգային հովանավորների ցուցակում ընդգրկվելու հետ կապված իրավիճակը, մենք պատրաստ չենք որևէ առաջընթացի այդ հարցում»,-ասել է Սիյարտոն հունգարացի լրագրողներին:
Ավելի վաղ Սիյարտոն հայտարարել էր, որ Հունգարիան արգելափակում է ԵՄ երկրներին խաղաղության եվրոպական հիմնադրամից 500 միլիոն եվրոյի հատկացումը Ուկրաինայի համար զենք գնելու համար, քանի դեռ OTR բանկի «ռուսական դստեր» ղեկավարությունը պատժամիջոցների տակ է, և Կիևի գրավոր երաշխիքներ չկան, որ բանկը կրկին չի ընդգրկվի «պատերազմի միջազգային հովանավորների» ցուցակում: