ԵՐԵՎԱՆ, 13 նոյեմբերի - Sputnik. Երևանում առաջին անգամ անցկացվել է հայկական ավանդական ուտեստի՝ Ղափամայի սեզոնային փառատոնը:
Փառատոնը կազմակերպվել է Կենտրոն վարչական շրջանի ղեկավարության նախաձեռնությամբ՝ քաղաքապետարանի և «Հայ խոհարարական ավանդույթների զարգացում և պահպանում» ՀԿ-ի աջակցությամբ:
Հայ խոհարարների նվաճումները ներկայացվել են «Վերնիսաժ» տոնավաճառում տեղադրված 12 տաղավարներում։
Փառատոնի անցկացման ժամանակը պատահական չի ընտրվել։ Ինչպես Sputnik Արմենիայի թղթակցի հետ զրույցում ասաց Կենտրոն վարչական շրջանի կրթության, մշակույթի և սպորտի բաժնի ղեկավար Նելլի Ասատրյանը, հենց այս ժամանակահատվածին է սովորաբար բաժին ընկնում դդմի բավականին խոշոր բերքը։
Կազմակերպիչները հույս ունեն նման մշակութային միջոցառումների միջոցով զբոսաշրջիկներին ծանոթացնել հայկական ազգային խոհանոցին, ինչպես նաև հանրահռչակել ավանդական ուտեստները: Ասատրյանը չի բացառում, որ փառատոնը կդառնա ավանդական և հաջորդ տարի ավելի ընդգրկուն բնույթ կկրի:
«Հայ խոհարարական ավանդույթների զարգացման և պահպանման» ՀԿ-ի նախագահ Սեդրակ Մամուլյանը Sputnik Արմենիայի թղթակցի հետ զրույցում հիշեցրեց, որ ղափաման մայրության, պտղաբերության խորհրդանիշ է, և որ ուտեստը պատրաստվում է տոներին։
«Ղափամայի տեսակները շատ են (բրնձով, ոլոռով, ձավարով, հաճարով), սակայն դասական բաղադրատոմսում բրինձ է, չրեր, մեղր, առանցքային բաղադրիչը դդումն է»,-ասաց Մամուլյանը:
Ուտեստը պատրաստելու համար մի քանի ժամ է պետք։ Նախ պատրաստում են միջուկը․ կիսաեփ բրինձ, կտրատած չրեր և ընկուզեղեն։ Այնուհետև պետք է դդումը կտրել վերևի մասից և մաքրել կորիզներից։ Չրերն ու ընկուզեղենը բովում են մինչև ոսկեգույն դառնալը, ավելացնում են մի քանի գդալ մեղր՝ ըստ ճաշակի, համեմունքներ (դարչին, մեխակ), խառնում են։ Դդմի ներսից մեղր են քսում։
«Դդումը, կախված ծավալից և հաստությունից, եփվում է մեկ-մեկուկես ժամ ջեռոցում կամ թոնրում, մինչև 180 աստիճան ջերմաստիճանում»,-ասաց Մամուլյանը:
Նա նշեց, որ ըստ ավանդության՝ ղափաման խորհրդանշում է Երկիրը, որտեղ բրինձը, մոլորակի նմանությամբ, մարդկությունն է, չիրը՝ ռասաների, ազգությունների ու կրոնների բազմազանությունը: Ուստի հիմնական ուղերձն այն է, որ ամբողջ մոլորակը խաղաղ ապրի՝ անկախ ազգությունից, սեռից, դավանանքից։