ԵՐԵՎԱՆ, 9 նոյեմբերի – Sputnik. Մշակույթի գործիչները պետք է վերականգնեն այն կամուրջները, որոնք այրում են քաղաքական գործիչները։ Գաբրիել Սունդուկյանի անվան ազգային ակադեմիական թատրոնում «Ամուսնություն» ներկայացումից առաջ այս հայտարարությունն արեց Ալեքսանդրինյան թատրոնի գեղարվեստական ղեկավար, Ռուսաստանի ժողովրդական արտիստ Վալերի Ֆոկինը։
Վալերի Ֆոկին
© Sputnik / Andranik Ghazaryan
Երևանի միջազգային թատերական փառատոնի ծրագրի շրջանակում նոյեմբերի 9-12-ը Հայաստանում անցկացվում են Ռուսաստանի ազգային դրամատիկական թատրոնի (Ալեքսանդրինյան թատրոն) օրեր։ Գաբրիել Սունդուկյանի անվան ազգային ակադեմիական թատրոնի բեմում նոյեմբերի 9-ին և 10-ին կցուցադրվեն Նիկոլայ Գոգոլի «Ամուսնություն» տրագիկոմեդիան, իսկ նոյեմբերի 12-ին՝ թատերախմբի գլխավոր ռեժիսոր Նիկիտա Կոբելևի «Արարածը» ներկայացումը, որի հիմքում Ֆյոդոր Սոլոգուբի «Փոքրիկ դևը» վեպն է։
Նրա խոսքով` այն ներկայացումները, որոնք կխաղան Երևանում, ցուցադրում են թատրոնի ներկայիս գեղարվեստական դեմքը։ Ալեքսանդրինյան թատրոնը 257 տարեկան է, և կան ավանդույթներ, որոնք պետք է պահպանվեն, բայց միաժամանակ դրանք պետք է հարմարեցվեն այսօրվա իրողություններին։
«Ես արդեն 20 տարի ղեկավարում եմ թատրոնը։ Իհարկե, այսօր ամեն ինչ փոխվել է ։ Դուք շատ լավ հասկանում եք, որ եթե թատրոնի տարիքը երևա բեմում, ապա դա կործանում է նշանակում։ Ուստի մեր խնդիրն է չհամապատասխանել այդ մեծ տարիքին», - ընդգծեց Վալերի Ֆոկինը։
Գաբրիել Սունդուկյանի անվան ազգային ակադեմիական թատրոնում բացվեց նաև ցուցահանդես, որը Ալեքսանդրինյան թատրոնը պատրաստել է Սանկտ Պետերբուրգի թատերական և երաժշտական արվեստի թանգարանի հետ համատեղ։ Ցուցահանդեսում ներկայացված են գեղարվեստական դեկորատիվ նախագծեր, որոնք կյանքի են կոչվել Ալեքսանդրինյան թատրոնի բեմում լեգենդար ռեժիսորների, թատրոնի և ոչ միայն թատրոնի արտիստների, այդ թվում` Բորիս Կուստոդիևի, Վլադիմիր Դմիտրիևի, Մոիսև Լևինի, Ալեքսանդր Բենուայի կողմից: