ԵՐԵՎԱՆ, 9 նոյեմբերի – Sputnik. ՄԱԿ–ի գլխավոր քարտուղար Անտոնիո Գուտերեշը Փարիզում կայացած համաժողովի ընթացքում կոչ է արել երկրներին 1.2 մլրդ դոլար հավաքել Գազայի հատվածի բնակչությանը մարդասիրական օգնություն ցուցաբերելու համար։
«Գազայի խաղաղ բնակչությունը, այդ թվում երեխաներն ու կանայք, այսօր անվերջանալի մարդասիրական մղձավանջի են բախվում։ Նրանց թաղամասերը ոչնչացվել են, հարազատները` սպանվել։ Ռումբերը նրանց վրա ընկնում են անձրևի պես այն դեպքում, երբ նրանց մերժում են տրամադրել ամենաանհրաժեշտը` սննունդ, ջուր, դեղորայք, էլեկտրականություն։ Մենք պետք է ակտիվացնենք Գազայի հատվածում քաղաքացիական բնակչության պաշտպանությանն ու օգնություն ցուցաբերելուն ուղղված ջանքերը։ Սա նշանակում է ֆինանսավորել մարդասիրական կոչը 1.2 մլրդ դոլարով, որը ՄԱԿ–ը հայտարարելէ հենց նոր, Գազայի ժողովրդին օգնելու համար», – ընդգծել է նա։
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։
Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ավիահարվածներ է հասցնում օդից, ծովից և ցամաքից։
Գազայի հատվածում իսրայելական հարվածների հետևանքով զոհերի թիվը գերազանցել է 10,3 հազարը, տուժել է ավելի քան 25 հազար մարդ։