ԵՐԵՎԱՆ, 9 նոյեմբերի — Sputnik. ԼՂ–ից բռնի տեղահանված 100 հազար անձանցից մոտ 15 հազարը թոշակառուներ են, որոնք կշարունակեն կենսաթոշակ ստանալ նաև ՀՀ–ում, երբ նրանց նույնականացման գործընթացն ավարտվի։ ՀՀ կառավարության նիստի ժամանակ այս մասին հայտարարեց ՀՀ աշխատանքի և սոցիալական հարցերի նախարար Նարեկ Մկրտչյանը։
Կենսաթոշակ ստանալու համար անհրաժեշտ կլինի ՀՀ–ում ստանալ գրանցում: Նախարարի խոսքով` ՀՀ ժամանելուց հետո 63 տարին նոր լրացած անձինք կկարողանան դիմում ներկայացնել այն նույն կարգով, որը նախատեսված է ՀՀ կենսաթոշակառուների համար:
Նույնը վերաբերում է նաև նպաստների ստացմանը՝ սոցիալական, երեխայի ծննդյան, խնամքի և այլն։
ՀՀ կառավարությունն այսօր հավանություն տվեց նաև ԼՂ–ի թոշակառուներին սոցիալական ապահովության համակարգում ընդգրկելու մասին օրինագծին: «Պետական կենսաթոշակների մասին» ՀՀ օրենքում համապատասխան փոփոխությունների նախագիծն ուղարկվեց Ազգային ժողով` անհետաձգելի ռեժիմով քննարկման։
Հիշեցնենք, որ Լեռնային Ղարաբաղից բռնի տեղահանվածների թոշակների ու նպաստների վճարման համար լրացուցիչ 30 մլրդ դրամ կավելացվի հաջորդ տարվա պետական բյուջեի նախագծի 2–րդ ընթերցմամբ քննարկման ժամանակ։ ԱԺ ֆինանսավարկային և բյուջետային հարցերի մշտական հանձնաժողովում այս մասին ասել էր ՀՀ ֆինանսների նախարար Վահե Հովհաննիսյանը։