ԵՐԵՎԱՆ, 9 նոյեմբերի – Sputnik․ Հայ-ամերիկյան համագործակցությունը շարունակվում է ըստ պլանների՝ բարձր հիմքերի վրա։ Այս մասին այսօր «Եռաբլուրում» լրագրողների հետ զրույցում ասաց ՀՀ ԳՇ պետ Էդվարդ Ասրյանը։
«Դա կարող է լինել և՛ուսումնական, և՛ ռազմական, և՛ ռազմատեխնիկական` համաձայն պլանների»,–նշեց նա։
Հարցին, թե ինչո՞ւ է Արարատ Միրզոյանը հայտարարում, որ Ադրբեջանն օկուպացրել է ՀՀ-ի 200 քառ. մետր տարածք, եթե ինքը ավելի վաղ ասել է 150-ի մասին` Ասրյանը պատասխանեց.
«Հետևեք քաղաքական լրահոսին, այնտեղ լրիվ կհնչեցվի։ Հիմա դրա ժամանակը չէ, որ նման հարցեր եք ինձ այստեղ տալիս»,– ասաց նա։
Լրագրողի հարցին, թե ինչու այսօր ՀՀ պաշտպանության նախարար Սուրեն Պապիկյանը չի եկել «Եռաբլուր», նա պատասխանեց, որ այստեղ այսօր զինվորականներ են։
Հիշեցնենք՝ 2020թ.–ի սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։
2020թ.–ի նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։
44–օրյա պատերազմի ընթացքում հայկական կողմն ունեցել է 3 825 զոհ։ 187 զինծառայողի և 21 խաղաղ բնակչի գտնվելու վայրն անհայտ է։
Այսօր մի խումբ բարձրաստիճան զինվորականներ գնացել էին «Եռաբլուրում» հարգելու 44–օրյա պատերազմի զոհերի հիշատակը։