ԵՐԵՎԱՆ, 7 նոյեմբերի – Sputnik. Հայաստանն առաջին անգամ հյուրընկալել է ավելի քան 2 միլիոն զբոսաշրջիկի։ Հերթական ռեկորդային ցուցանիշը հայտնում է ՀՀ Զբոսաշրջության կոմիտեն։ Առջևում դեռ երկու ամիս կա, այնպես որ, այս ցուցանիշի ավելացում էլ է սպասվում։
«Մենք ունեցել ենք 2 միլիոն 50 հազար զբոսաշրջային այցելություն 2023թ. հունվարից հոկտեմբեր ընկած ժամանակահատվածում»,– տեղեկացնում են կոմիտեից։
Վերջին մի քանի տարվա համեմատ ռեկորդային է նաև հոկտեմբերը` եղել է 195 հազար զբոսաշրջիկ։ Նշենք, որ 2022թ. հոկտեմբերին Հայաստան էր այցելել 155 հազար, 2019թ.–ին` 192 հազար զբոսաշրջիկ:
Ամենամեծ թվով զբոսաշրջիկներ Հայաստան են ժամանել Ռուսաստանից, երկրորդ տեղում Վրաստանն է, երրորդում` Իրանը։