ԵՐԵՎԱՆ, 6 նոյեմբերի – Sputnik. Սլովակիան կշարունակի Ուկրաինային մարդասիրական օգնություն ցուցաբերել, կարող է օգնել նաև տարածքի ականազերծման հարցում, սակայն այլևս նրան զենք չի մատակարարի։ Այս մասին, ՌԻԱ Նովոստիի փոխանցմամբ, այսօր Պրահայում հրավիրված մամուլի ասուլիսի ժամանակ հայտարարեց Սլովակիայի արտգործնախարար Յուրայ Բլանարը։
«Սլովակիան Ուկրաինայում հակամարտության առաջին իսկ օրվանից այդ երկրին զգալի մարդասիրական օգնություն է ցուցաբերել։ Մենք մտադիր ենք շարունակել դա անել նաև հետագայում։ Բացի այդ, մենք ուզում ենք օգնել ուկրաինական տարածքի ականազերծման հարցում, այդ հարցում լավ մասնագետներ ունենք։ Սակայն մենք մեր բանակի պահուստից սպառազինության կամ զենքի որևէ տեսակ չենք մատակարարի։ Նախ` այնտեղ գրեթե որևէ ավելորդ բան արդեն չի մնացել, երկրորդը` մենք պետք է հոգ տանենք մեր անվտանգության մասին։ Կարծում եմ, որ առաջին հերթին խաղաղ նախաձեռնություններ են անհրաժեշտ», – հայտնել է Բլանարը` ելույթ ունենալով Չեխիայի արտգործնախարար Յան Լիպավսկիի հետ բանակցություններից հետո հրավիրված մամուլի ասուլիսին։
Ավելի վաղ ՌԴ–ն բոլոր երկրներին, այդ թվում` ԱՄՆ–ին, նոտա էր հղել Ուկրաինային զենք մատակարարելու պատճառով։ ՌԴ արտգործնախարար Սերգեյ Լավրովը նշել էր, որ ցանկացած բեռ, որը սպառազինություն է պարունակում Ուկրաինայի համար, Ռուսաստանի համար օրինական թիրախ է հանդիսանալու։ ՌԴ ԱԳՆ–ում հայտարարել էին, որ ՆԱՏՕ–ի երկրները «կրակի հետ են խաղում»` Ուկրաինային զենք մատակարարելով։ Պեսկովը նշել էր, որ Արևմուտքի կողմից Ուկրաինային զենքով զինելը ռուս–ուկրաինական բանակցությունների հաջողությանը չի նպաստում և բացասական ազդեցություն է ունենալու։