ԵՐԵՎԱՆ, 6 նոյեմբերի – Sputnik. Բաքվում մինչ օրս պահվող հայ ռազմագերիների, անհետ կորածների խնդիրները, ինչպես նաև Ադրբեջանի իշխանությունների կողմից ԼՂ հայության նկատմամբ իրականացրած ցեղասպան գործողությունները, բռնի տեղահանվածների կարգավիճակի, ապաստանի, աշխատանքի և այլ կարիքների ապահովման անհրաժեշտությունը քննարկվել են ՀՀ ԱԺ «Պատիվ ունեմ» խմբակցության պատգամավորների և ԵԽԽՎ մոնիտորինգի հանձնաժողովի Հայաստանի հարցերով համազեկուցողների հանդիպմանը։ Տեղեկությունը հայտնում են Հայաստանի Հանրապետական կուսակցությունից։
Հանդիպմանը մասնակցել են ՀՀ ԱԺ «Պատիվ ունեմ» խմբակցության ղեկավար Հայկ Մամիջանյանը և խմբակցության պատգամավոր Թագուհի Թովմասյանը, իսկ ԵԽԽՎ մոնիտորինգի հանձնաժողովից Կիմո Կիլյունենն ու Բորիանա Աբերգը:
Հանդիպմանը «Պատիվ ունեմ» խմբակցության անդամներն անդրադարձել են նաև ՀՀ-ում ժողովրդավարական արժեքների ոտնահարմանը, քրեական գործերը՝ որպես ընդդիմադիրներին լռեցնելու գործիք, իսկ կալանքը՝ որպես պատիժ կիրառելու դեպքերին, քաղաքական բանտարկյալների նկատմամբ իրականացվող ճնշումներին և ներքաղաքական այլ զարգացումներին: