ԵՐԵՎԱՆ, 6 նոյեմբերի – Sputnik. ՀՀ աշխատանքի և սոցիալական հարցերի նախարարությունը նախատեսում է մշակել և իրացնել նոր կարգավորում, որը հնարավորություն կտա աշխատաշուկայի օրինական դաշտից դուրս մնացած ինքնազբաղներին և գյուղատնտեսությամբ զբաղվողներին կամավորության սկզբունքով հայտարարագրել իրենց եկամուտները և վճարելով դրանից հաշվարկվող հարկերն ու վճարները` կուտակել աշխատանքային ստաժ, ինչը կհաշվարկվի կենսաթոշակի անցնելիս։ Այս մասին 2024 թ. պետական բյուջեի քննարկմանը` ԱԺ մշտական հանձնաժողովների համատեղ նիստում հայտարարեց ՀՀ աշխատանքի և սոցիալական հարցերի նախարար Նարեկ Մկրտչյանը։
Նախարարությունը կենսաթոշակային օրենսդրության այս և այլ փոփոխությունները կներկայացնի Ազգային ժողով, որպեսզի դրանք ուժի մեջ մտնեն 2024 թվականի երկրորդ կիսամյակից։
«1974 թվականին և դրանից հետո ծնվածների դեպքում պետությունը կկատարի օրենքով սահմանված պարտադիր կուտակումները քաղաքացու կենսաթոշակային հաշվին»,- հավելեց նախարարը։
Նշենք, որ խորհրդային տարիներին գյուղացիների համար ստաժը հաշվարկվում էր կոլտնտեսություններում և սովխոզներում մասնակցության հիման վրա (և դրանց անդամ էին գրեթե բոլոր գյուղացիները): Բացի այդ, զբաղվածությունը պահպանելու համար գյուղերում բացվում էին արդյունաբերական ձեռնարկություններ (այդ թվում՝ շրջկենտրոններում տեղակայված գործարանների մասնաճյուղեր)։ ԽՍՀՄ փլուզմամբ գյուղացիները կորցրին ստաժ հավաքելու այս բոլոր հնարավորությունները։
Նշենք, որ Ազգային վիճակագրական ծառայության վերջին տվյալներով՝ Հայաստանի գյուղերում ապրում է մոտ 1 մլն 82 հազար մարդ (հանրապետության բնակչության մոտ 37%-ը)։