ԵՐԵՎԱՆ, 6 նոյեմբերի – Sputnik. Հայաստանում նախատեսվում է ջրծաղիկի պատվաստանյութի կիրառում ներդնել: ԱԺ առողջապահության, ինչպես նաև ֆինանսավարկային և բյուջետային հարցերի մշտական հանձնաժողովների համատեղ նիստում 2024 թվականի պետական բյուջեի քննարկման ժամանակ այս մասին ասաց ՀՀ առողջապահության նախարար Անահիտ Ավանեսյանը։
Նա նշեց, որ 2024 թվականին իմունականխարգելման ազգային ծրագրի համար հատկացումներն ավելանալու են 16.4 տոկոսով՝ շուրջ 728 մլն դրամով:
«Դրա շնորհիվ մեր երկրում կարողանալու ենք ներդնել ջրծաղիկի պատվաստանյութի կիրառումը: Կարծում եմ՝ սա կնպաստի երեխաների, նաև զորակոչիկների առողջության ու աշխատունակության պահպանմանը, նաև որոշակի առումով անվտանգային կարևոր լուծում է։ Ջրծաղիկը շատ բարձր վարակելիություն ունի»,- ասաց Ավանեսյանը:
Նախարարն օրինակ բերեց մանկապարտեզները` նշելով, որ թե եթե մի խմբում ջրծաղիկի դեպք է գրանցվում, ապա այդ հաստատությունում գրեթե բոլորը վարակվում են, լինում են նաև ծանր դեպքեր: