Մեկ ամիս անց մինուճար որդին ողջ է գտնվել. արցախցի ընտանիքի հրաշքի մասին պատմությունը

ԵՐԵՎԱՆ, 5 նոյեմբերի – Sputnik. Արցախից բռնի տեղահանված և Բյուրեղավանում հաստատված Հակոբյանների ընտանիքը մինուճար որդու՝ 20-ամյա Ռաֆայելի մասին շուրջ մեկ ամիս որևէ տեղեկություն չուներ։ Սպասում էին ամենավատին` ԴՆԹ թեստի հաստատմանը, դրա փոխարեն որդուց զանգ են ստանում. ողջ է, Ստեփանակերտում է։ Հրաշք թվացող այս պատմության մասին mediahub.am–ում տեսանյութ է պատրաստել Հունան Թադևոսյանը, որը նախկինում Արցախի ներքին գործերի նախարարության տեղեկատվության և հասարակայնության հետ կապերի բաժնի պետն էր։

Հակոբյանները որդու հետ վերջին անգամ խոսել էին սեպտեմբերի 18-ին, հաջորդ զանգն արդեն հոկտեմբերի 22-ին էր։

Ռաֆայելի խոսքով` արդեն Գետավանի հանգստյան գոտիներից մեկի շինությունում ադրբեջանցի ոստիկանն է նկատել իրեն, սակայն չի վնասել ու փոխանցել է Կարմիր խաչի առաքելության աշխատակիցներին։ Նրանց օգնությամբ էլ Ռաֆայելը տեղափոխվել է Ստեփանակերտ, անգամ իրենց տուն է գնացել։

«Երբ քաղաքն ու տունը դատարկ եմ տեսել, հասկացել եմ՝ Արցախն այլևս հայկական չէ»,– ասում է Ռաֆայելը։

Ի դեպ, Ռաֆայելի հայրը՝ Մխիթարը, փրկարար ծառայության աշխատակից է, նա իր որդուն անգամ զոհվածների մեջ է փնտրել։ Հայրը երազում է, որ բոլոր անհետ կորածները իր Ռաֆոյի ճակատագիրն ունենան, բոլորը վերադառնան։

Հոդվածն ամբողջությամբ` սկզբնաղբյուրում։

Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։

Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցինԵվլախում, սեպտեմբերի 25–ին` Իվանյանում, սեպտեմբերի 29-ին` կրկինԵվլախում։ Սեպտեմբերի 24-ին սկսվեց արցախցիների բռնի տեղահանումը։

Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։

Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։