ԵՐԵՎԱՆ, 4 նոյեմբերի – Sputnik. Բոլոր նախադրյալները կան Հայաստանի և Ադրբեջանի միջև խաղաղության պայմանագրի ստորագրման համար։ Այս հայտարարությունն արել է ՌԴ անվտանգության խորհրդի քարտուղար Նիկոլայ Պատրուշևը՝ ելույթ ունենալով «Ռուսաստան» համաժողով-ցուցահանդեսի շրջանակում։
«Բոլոր նախադրյալները կան»,- ընդգծել է նա՝ խոսելով համաձայնագրի ստորագրման հեռանկարների մասին։
ՌԴ անվտանգության խորհրդի քարտուղարն անդրադարձել է նաև ՀՀ վարչապետ Նիկոլ Փաշինյանի` Լեռնային Ղարաբաղի վերաբերյալ հայտարարությանը։
«Նա հայտարարություններ է արել, որ մենք (Երևանը. խմբ.) ճանաչելու ենք տարածքները 1991 թվականի քարտեզով․․․ Նա հստակ նշել է այն տարածքները, որոնք պատկանում են Հայաստանին և որոնք պատկանում են Ադրբեջանին։ Ես կարծում եմ, որ այդ խոստովանություններն ու հայտարարությունները նա արել է Արևմուտքի ազդեցության տակ։ Նա նրանց հետ բանակցություններ էր վարում»,- ասել է Պատրուշևը։
Հիշեցնենք, որ 2021 թվականին Ադրբեջանի նախագահ Իլհամ Ալիևը հայտարարեց Հայաստանի հետ խաղաղության պայմանագիր ստորագրելու պատրաստակամության մասին։ 2022 թվականի մարտին Բաքուն Երևանին փոխանցեց հարաբերությունների կարգավորման վերաբերյալ հինգ կետից բաղկացած իր առաջարկը: Հայկական կողմը շտկումներ ավելացրեց և ուղարկեց իր տարբերակը։ Այդ ժամանակից ի վեր կողմերի միջև տարբեր մակարդակներով բանակցությունների մի քանի փուլ է եղել։
ՀՀ արտաքին գործերի նախարար Արարատ Միրզոյանը ՀՀ արտաքին գործերի նախարար Արարատ Միրզոյանը հոկտեմբերի 3-ին հայտնեց, որ Երևանի և Բաքվի միջև ընթանում է առաջարկների փոխանակման 6-րդ փուլը։
Հաջորդ օրը ՀՀ վարչապետ Նիկոլ Փաշինյանը հայտարարեց, որ երեք սկզբունք կա, որոնց շուրջ համաձայնության գալու դեպքում խաղաղության պայմանագիրը կստորագրվի։