ԵՐԵՎԱՆ, 4 նոյեմբերի – Sputnik. Հայաստանում Եվրոպական միության դիտորդական առաքելության ղեկավարի տեղակալ Մարեկ Կուբերսկին Գերմանիայի արտաքին գործերի նախարար Անալենա Բերբոքին է ներկայացրել Արարատի մարզի Երասխ համայնքում տիրող սահմանային իրավիճակը։ Տեղեկությունը հայտնում է «Արմենպրեսը»։
Դիտորդները Գերմանիայի արտաքին գործերի նախարարին ուղեկցել են դեպի այն հատված, որտեղ նախատեսված էր կառուցել հայ-ամերիկյան ներդրմամբ մետաղաձուլական գործարանը։
Նշենք, որ գործարանի կառուցման աշխատանքները դադարեցվել էին, քանի որ Ադրբեջանի զինված ուժերը պարբերաբար կրակում էին գործարանի ուղղությամբ, ինչի հետևանքով վիրավորվել էին շինարարական աշխատանքներ իրականացնող օտարերկրացիներից երկուսը։ Հայաստանի էկոնոմիկայի նախարար Վահան Քերոբյանն օրերս հայտարարեց, որ գործարանի կառուցումն ընթացքի մեջ է, սակայն ոչ թե նույն վայրում, այլ մոտակայքում։
«Կուբերսկին Գերմանիայի ԱԳ նախարարին ցույց տվեց գործարանի վարչական շենքի պատերին մնացած կրակոցների հետքերը, ծանոթացրեց դրա հետ կապված պատմությունը՝ նշելով, որ գործարանն արդեն այլ վայրում է կառուցվելու»,- գրում է գործակալությունը։
Ըստ լրատվամիջոցի` Կուբերսկին Անալենա Բերբոքին տեղեկացրել է, որ իրենք դիտորդական առաքելություն են իրականացնում դիտորդական 6 օպերատիվ բազաներից։ Նա ընդգծել է, որ այն պահերին, երբ իրենք սահմանային հատվածներում դիտարկում են իրականացնում, էքսցեսներ հիմնականում չեն լինում, իսկ իրավիճակն ընդհանուր առմամբ հանգիստ է։
Գերմանիայի ԱԳ նախարարը հետաքրքրվել է, թե որքան է հեռավորությունը ադրբեջանական դիտակետերից մինչև Երասխ և ինչ հաճախականությամբ են դիտորդները դիտարկում իրականացնում Երասխի հատվածում։
Նրան տրվել է ամփոփ տեղեկատվություն։
Գերմանիայի ԱԳ նախարարն ուղևորվել է Արարատի մարզի Ոստան գյուղ՝ հանդիպելու ԼՂ-ից բռնի տեղահանվածների հետ։
Հիշեցնենք` Բերբոքը Հայաստան է ժամանել աշխատանքային այցով։ Երեկ նա առանձնազրույց է ունեցել ՀՀ արտգործնախարար Արարատ Միրզոյանի հետ, այնուհետև հանդես եկել ՀՀ ԱԳ ղեկավարի հետ համատեղ ասուլիսով։ Բերբոքն այսօր մեկնելու է Ադրբեջան, որտեղ բանակցություններ են նախատեսված Ադրբեջանի արտգործնախարար Ջեյհուն Բայրամովի հետ, ինչպես նաև հանդիպում քաղաքացիական հասարակության ներկայացուցիչների հետ: