ԵՐԵՎԱՆ, 3 նոյեմբերի – Sputnik. Հայաստանի Հանրապետությունն ակնկալում է Գերմանիայի Դաշնության գործարար շրջանակների հետ ակտիվ փոխգործակցության համատեքստում առևտրաշրջանառության ծավալների նոր նշաձողեր սահմանել։ Այս մասին Գերմանիայի ԱԳ նախարար Անալենա Բերբոքի հետ համատեղ մամուլի ասուլիսի ժամանակ հայտարարեց ՀՀ արտգոծնախարար Արարատ Միրզոյանը։
Նա հիշեցրեց, որ Գերմանիան Եվրոպական Միությունում Հայաստանի առաջին առևտրային գործընկերն է։
«Մենք ակնկալում ենք, որ 2 երկրի գործարար շրջանակների ակտիվ փոխգործակցությունը թույլ կտա սահմանել առևտրաշրջանառության ծավալների նոր ու ավելի հավակնոտ նշաձողեր։ Մեծապես կարևորում ենք Գերմանիայի միջազգային համագործակցության գործակալության (GIZ) և Վերակառուցման և զարգացման բանկի գործունեությունը Հայաստանում։ Արժևորում և գնահատում ենք Հայաստանի ընդգրկումը Գերմանիայի «BMZ 2030 բարեփոխումների ռազմավարության» շրջանակներում` միտված բարելավելու Հայաստանում ընթացիկ բարեփոխումների և ծրագրերի կայուն շարունակականությանը»,– ասաց Միրզոյանը։
Նա շեշտեց, որ գոհունակությամբ արձանագրվել է տնտեսության, գիտության, կրթության, առողջապահության և այլ ոլորտներում խորացող փոխգործակցությունը և հեռանկարները։
ՀՀ ԱԳ նախարարը նշեց, որ գերմանացի գործընկերոջը ներկայացրել է ժողովրդավարական ինսիտուտների ամրապնդման, կոռուպցիայի դեմ պայքարի, կանանց, խոցելի խմբերի իրավունքների պաշտպանությանն ուղղված բարեփոխումների Հայաստանի ծավալուն օրակարգը։
Գերմանիայի Դաշնային Հանրապետության արտաքին գործերի նախարար Անալենա Բերբոքը Հայաստան է ժամանել աշխատանքային այցով։
Լեռնային Ղարաբաղից էթնիկ հայերի տեղահանությունն անընդունելի է. Գերմանիայի արտգործնախարար
Последний редактировал: Armine Alexanyan
Նա առանձնազրույց է ունեցել ՀՀ արտգործնախարար Արարատ Միրզոյանի հետ, դրան հաջորդել է ընդլայնված կազմով հանդիպումը երկու պատվիրակությունների մասնակցությամբ։
Բերբոքը նոյեմբերի 4-ին մեկնելու է Բաքու։