ԵՐԵՎԱՆ, 3 նոյեմբերի – Sputnik. Հայաստանը Եվրամիության հետ համագործակցության 2024 թվականի ծրագրով ակնկալում է ստանալ 17,9 միլիոն եվրոյի դրամաշնորհային միջոցներ։ Այսօր ԱԺ մշտական հանձնաժողովների համատեղ նիստում 2024 թվականի պետական բյուջեի քննարկմանն ասաց ՀՀ ֆինանսների նախարար Վահե Հովհաննիսյանը։
Նրա խոսքով` աջակցությունը մեր երկրի տրամադրվում է 3 հիմնական ուղղություններով։
«Առաջինը` աջակցություն Հայաստանում դատական ոլորտի բարեփոխումների իրականացմանը. այս ծրագիրը 2023-ին էլ կար` 2,7 մլն եվրոյի չափով, իսկ 2024-ին արդեն 5,4 մլն եվրոյի չափով է։ Հաջորդը` Հայաստանում դատական ոլորտում բարեփոխումների իրականացմանը`փուլ 2, որը հավելյալ 2,5 միլիոն եվրո է»,– նշեց նախարարը։
Նա նշեց, որ աջակցության երրորդ ուղղությունն էլ կրթությունն է։ 2024 թվականի համար նախագիծը 10 միլիոն եվրոյի չափով է, իսկ ծրագրի ընդհանուր արժեքը 32 միլիոն եվրո է։