ԵՐԵՎԱՆ, 3 նոյեմբերի – Sputnik. Այսօր էլ մենք ունենք լուրջ մտավախություններ, որ մասնավորապես Ադրբեջանի կողմից կան հավակնություններ` տարածքային պահանջներ ՀՀ–ի նկատմամբ, կան նաև վերապահումներ ՀՀ ինքնիշխանության նկատմամբ, մասնավորապես` երբ խոսքը գնում է տարածաշրջանային ենթակառուցվածքների ու տրանսպորտային ուղիների ապաշրջափակման մասին։ Այս մասին Գերմանիայի ԱԳ նախարար Անալենա Բերբոքի հետ համատեղ մամուլի ասուլիսի ժամանակ հայտարարեց ՀՀ արտգոծնախարար Արարատ Միրզոյանը։
Նա պատասխանեց գերմանական լրատվամիջոցի այն հարցին, թե ՀՀ–ի հարաբերությունները վատացել են ՌԴ–ի հետ, և կան հարևան ոչ բարեկամ երկրներ, արդյոք ՀՀ–ն այդպիսով ճնշված է այսօր ու ցանկանում է, որ ԵՄ–ն` ի դեմս Գերմանիայի, ավելի մեծ աջակցություն ցուցաբերի ՀՀ–ին։
«Մենք ունենք 4 հարևան, որոնցից երկուսի հետ ունենք փակ սահմաններ։ Հիմա կարգավորման գործընթաց է գնում Ադրբեջանի ու Թուրքիայի հետ։ Երբեմն մեզ թվում է` մենք մոտ ենք հանգուցալուծմանը, երբեմն տեսնում ենք, որ նոր խոչընդոտներ են ի հայտ գալիս»,– հայտարարեց ՀՀ արտաքին գործերի նախարարը։
Նա ընդգծեց, որ ՀՀ–ն և' տնտեսական (այդ թվում էներգետիկ փոխկապակցվածության), և' քաղաքական, և' արժեքների, և' անվտանգային առումներով իսկապես շահագրգռված է խորացնելու իր կապերը եվրոպական երկրների, մասնավորապես` Գերմանիայի հետ։
«Անվտանգային այն մեխանիզմները, որոնք ՀՀ–ն նախատեսել էր, մենք տեսանք, որ իրականում արդյունավետ դուրս չեկան»,– նկատեց Միրզոյանը։
Ըստ նախարարի` այս գիտակցումը ՀՀ իշխանությունները տեսնում են և' հայկական, և' եվրոպական բազմաթիվ երկրների կողմից։