ԵՐԵՎԱՆ, 2 նոյեմբերի – Sputnik. Արդյոք ՀՀ կրթության, գիտության, մշակույթի և սպորտի նախարարությունում Հովհաննես Թումանյանի թանգարանի տնօրենի պաշտոնում ցանկանում են իրենց ծանոթին նշանակել։
Այս հարցը լրագրողները կառավարության նիստից հետո ճեպազրույցի ժամանակ հղեցին ԿԳՄՍ փոխնախարար Արաքսյա Սվաջյանին, ով, ըստ էության, հստակ պատասխան չտվեց։
«Դա ձեր անձնական կարծիքն է, անձնական մեկնաբանություններ են»,– նշեց Սվաջյանը։
Հարցին` թանգարանի տնօրենը վա՞տ է աշխատել իր պաշտոնավարման ընթացքում, Սվաջյանն ընդգծեց, որ ինքը տեղյակ չէ։
Նշենք, որ օրեր առաջ Հովհաննես Թումանյանի թանգարանի տնօրեն Անի Եղիազարյանին աշխատանքից հեռացրել են առանց ԿԳՄՍ նախարար Ժաննա Անդրեասյանի հրամանի արտերկիր աշխատանքային այց կատարելու համար։ Բայց այդ այցը դեռ տարեսկզբին ծրագրված ու հաստատված է եղել։ Եղիազարյանն ընդգծել էր` տարեսկզբին թանգարանի նախանշված ծրագրերում նախատեսված հրավերք-այց է եղել Հարավային Ամերիկայի երկու երկիր՝ Ուրուգվայ և Արգենտինա։
Sputnik Արմենիայի հետ զրույցում Եղիազարյանը հայտնել էր, որ կատարվածի վերաբերյալ զրուցելու համար ԿԳՄՍ նախարար Ժաննա Անդրեասյանի հետ հրապարակային հանդիպում է խնդրել, քանի որ մի ամբողջ օր անցկացրել է նախարարի ընդունարանում՝ ժամ վերցնելու խնդրանքով, բայց այդ հնարավորությունն այդպես էլ չի ունեցել։
Սվաջյանը լրագրողներին ասաց, որ ցանկացած կազմակերպությունում աշխատանքային փոխհարաբերությունները կառուցվում են Աշխատանքային օրենսգրքի հիման վրա։
«Բոլոր այն դեպքերում, երբ սահմանված կանոնները չեն պահպանվում, դրան հաջորդում են համապատասխան գործողությունները։ Հարցը ոչ թե Թումանյանին չներկայացնելն է, այլ իր գործատուի կողմից հրաման ունենալը»,– նշեց փոխնախարարը։
Հիշեցնենք` Անի Եղիազարյանը «Հովհաննես Թումանյանի թանգարան» ՊՈԱԿ-ի տնօրենի պարտականությունները ստանձնել էր 2019 թվականին։