ԵՐԵՎԱՆ, 2 նոյեմբերի – Sputnik. Երևանը պետք է լինի «խելացի քաղաք»` թվայնացված ու արդիականացված, այդ հարցում չինական Ցինդաոյի փորձը կարող է օգտակար լինել։ Այս մասին հայտարարել է Երևանի քաղաքապետ Տիգրան Ավինյանը Ցինդաոյի քաղաքային ժողովրդական կոնգրեսի մշտական հանձնաժողովի նախագահ Վան Լյումինգի գլխավորած պատվիրակության հետ հանդիպման ժամանակ, հայտնում է քաղաքապետարանի մամուլի ծառայությունը։
Տիգրան Ավինյանի ու Ցինդաոյի քաղաքային ժողովրդական կոնգրեսի մշտական հանձնաժողովի նախագահ Վան Լյումինգի գլխավորած պատվիրակության հանդիպումը
© Photo : official site of Yerevan municipality
Առանձնակի կարևորելով երկուստեք կապերի ամրապնդումն ու ընդլայնումը՝ քաղաքապետ Ավինյանը նշել է, որ կողմերը պետք է հետևողական աշխատանք տանեն ստորագրված փաստաթուղթը գործնականում կյանքի կոչելու համար:
«Մենք պետք է համատեղենք մեր երկու թիմերի ջանքերը, որ Երևանի և Ցինդաոյի միջև հաստատված գործակցությունը դառնա արդյունք: Ես տպավորված եմ Չինաստանի տարբեր քաղաքներում ներդրված խելացի լուծումներով ու համակարգերով, որոնք հեշտացնում են մարդկանց կյանքը»,- ընդգծել է Երևանի քաղաքապետը:
Վան Լյումինգը Երևանի քաղաքապետ Տիգրան Ավինյանին պաշտոնական այցով հրավիրել է Ցինդաո:
«Ցինդաոն Չինաստանի, Երևանն էլ Հայաստանի տնտեսական կենտրոնն է, և ես վստահ եմ, որ համագործակցության շրջանակում շատ բաներ կսովորենք իրարից, ինչից կշահեն երկու քաղաքները»,– ասել է Վան Լյումինգը։
Տիգրան Ավինյանն ու Ցինդաոյի քաղաքային ժողովրդական կոնգրեսի մշտական հանձնաժողովի նախագահ Վան Լյումինգը
© Photo : official site of Yerevan municipality
Հանդիպման շրջանակում կողմերը պայմանավորվել են քաղաքային տնտեսության հստակ ուղղություններով մշակել աշխատանքային ծրագիր՝ գործնականում դրանք կյանքի կոչելու համար:
Նշենք, որ երկու քաղաքների միջև այս տարի ամռանը ստորագրվել է քույր քաղաքների հարաբերություններ հաստատելու մասին համաձայնագիր: