ՑԱԽԱԼ–ը Գազայի հատվածում կրակել է շտապօգնության մեքենայի վրա, կան վիրավորներ

ԵՐԵՎԱՆ, 2 նոյեմբերի – Sputnik. Իսրայելական ուժերը Գազայի հատվածում կրակ են բացել պաղեստինյան Կարմիր կիսալուսնի շտապօգնության մեքենայի վրա, բուժանձնակազմը վիրավորում է ստացել։ Այս մասին հայտնում է ՌԻԱ Նովոստին` հղում անելով կազմակերպությանը։

Ավելի վաղ ԱՀԿ–ն հայտարարել էր, որ հոկտեմբերի 7-ից Գազայում գրանցվել է մոտ 75 հարձակում առողջապահության ոլորտի վրա, 16 բուժաշխատող սպանվել է, 30-ը` վիրավորվել։ Վնասվել է շտապօգնության 24 մեքենա և 34 բուժհաստատություն։ 35 հիվանդանոցներից 23-ը դեռ մասամբ գործում են, սակայն ծայրահեղ կարևոր գործառույթները վտանգի տակ են։ Միայն 8 հիվանդանոց է մնացել վիրաբուժական ներուժով Վադի Գազայից դեպի հարավ ընկած հատվածում, բոլորը գործում են միայն մասամբ։

Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։

Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ավիահարվածներ է հասցնում օդից, ծովից և ցամաքից։