Բոլոր դասագրքերն արդեն դպրոցներում են. Սվաջյանը` «դասագրքային իրարանցման» մասին

ԵՐԵՎԱՆ, 2 նոյեմբերի – Sputnik. Հայաստանի Հանրապետության բոլոր դպրոցների 5-րդ և 7-րդ դասարանների դասագրքերն արդեն տրամադրվել են հաստատություններին։ Այս մասին կառավարության նիստից հետո ճեպազրույցի ժամանակ ասաց ՀՀ կրթության, գիտության, մշակույթի և սպորտի նախարարի տեղակալ Արաքսիա Սվաջյանը` անդրադառնալով դեռևս առկա այն բողոքներին, շուտով առաջին կիսամյակը կավարտվի, բայց դասագրքերը դեռևս պատրաստ չեն։

Դիտարկմանը, որ ԿԳՄՍ–ում տվյալ ոլորտը գուցե լավ չի համակարգվում, Սվաջյանը շեշտեց. «Դա ձեր անձնական կարծիքն է»։

Նախարարը չանդրադարձավ՝ ինչ վիճակ է 2-րդ դասարանի դասագրքերի առումով։

Հիշեցնենք, որ ԿԳՄՍ որոշումը` այս տարվանից հանրապետության բոլոր դպրոցների 2–րդ, 5-րդ ու 7-րդ դասարաններում ներդնել կրթության նոր չափորոշիչներ, մեծ աղմուկ էր բարձրացրել կրթական ոլորտում։ Ստացվել էր այնպես, որ ուսումնական տարին 2–րդ, 5-րդ ու 7-րդ դասարանի աշակերտները սկսեցին առանց դասագրքերի, որոնք նոր չափորոշիչների գլխավոր բաղադրիչներից մեկն էին։ Դրանք տպագրել ու սեպտեմբերի 1-ին դպրոցներին մատակարարել նախարարությունը չհասցրեց։