ԵՐԵՎԱՆ, 2 նոյեմբերի – Sputnik. Հայաստանի և Ադրբեջանի սահմանների դելիմիտացիայի, դեմարկացիայի շրջանակներում բոլոր տեսակի հարցերը քննարկման ենթակա են, եթե դրանք ունեն իրավական հիմքեր, քարտեզագրված են ու գրանցված են երկկողմանի համաձայնագրերում։ Այս մասին ԱԺ–ում լրագրողների հետ ճեպազրույցում հայտարարեց ԱԺ փոխնախագահ Հակոբ Արշակյանը` պատասխանելով հարցին, թե ի՞նչ է լինելու, այսպես կոչված, «անկլավների» հարցը։
Հակոբ Արշակյանը նշեց, որ դելիմիտացիայի և դեմարկացիայի գործընթացը պետք է տեղի ունենա խորհրդային քարտեզների հիման վրա, ինչի մասին բազմիցս խոսվել է։
«Տարածքների թվերը վերցվել են խորհրդային վերջին հանրագիտարանից: Կան քարտեզներ, որոնց երկու կողմերը հասանելիությունը ունեն: Այսինքն` այստեղ որևէ մութ սենյակներ, մութ անկյուններ պետք չէ փնտրել»,– ասաց նա։
Հակոբ Արշակյանը տեղեկացրեց նաև` Ադրբեջանի տարածքում էլ հայկական «անկլավ» կա, ու երբ դրանք համադրվում են այսպես կոչված ադրբեջանական «ակլավների» հետ, գրեթե նույն քանակի տարածքներն են ստացվում:
Նա հավելեց նաև, որ ՀՀ-ն ու Ադրբեջանը կարիք ունեն հստակեցնելու իրենց տարածքային ամբողջականության փոխադարձ ճանաչման և դա գրավոր ընդունելու հարցը ու հորդորեց լրագրողներին հանգիստ թողնել, որ բանակցությունները ընթանան։
Նշենք, որ հոկտեմբերի 17-ին Ստրասբուրգում Եվրախորհրդարանի լիագումար նիստի ժամանակ ՀՀ վարչապետ Նիկոլ Փաշինյանը հայտարարել էր, որ Հայաստանը պատրաստ է փոխադարձության սկզբունքով հասցեագրել նաև անկլավների հարցը։