ԵՐԵՎԱՆ, 1 նոյեմբերի – Sputnik. ՀՀ վարչապետի աշխատակազմում նախորդ տարվա համեմատ ավտոմեքենաների թիվը կրճատվել է շուրջ 30-ով, այժմ 40 մեքենա կա, սակայն բոլորը չէ, որ ծառայողական են։ Այս մասին ԱԺ-ում 2024 թվականի պետական բյուջեի նախագծի քննարկումից հետո ճեպազրույցի ժամանակ հայտնեց ՀՀ վարչապետի աշխատակազմի ղեկավարի տեղակալ Արմենակ Խաչատրյանը։
«Եթե չեմ սխալվում, անցած տարի դրանք 70 և ավելին էին, իսկ այժմ վարչապետի աշխատակազմում 40 մեքենա կա։ Ընդ որում միայն ծառայողականները չեն, կան նաև հերթապահ մեքենաներ, ավտոբուսներ։ Վարչապետի աշխատակազմի «բալանսում» կան վարչապետին, փոխվարչապետներին, աշխատակազմի ղեկավարին, ԱԽ քարտուղարին, նախկին նախագահներին սպասարկող մեքենաներ։ Հերթապահ սպասարկող մեքենաներից էլ ըստ անհրաժեշտության օգտվում են աշխատակազմի բոլոր աշխատակիցները, այդ թվում՝ ես։ Օրինակ, այսօր գործընկերներիս հետ մեզ տրամադրված համապատասխան զեկուցագրով հերթապահ մեքենաներից մեկով եկել ենք Ազգային ժողով և վերադառնալու ենք»,– ասաց Խաչատրյանը։
Նա վստահեցրեց` այդ մեքենայով ինքը տուն չի գնում, տնից էլ աշխատանքի չի գալիս։