ԵՐԵՎԱՆ, 1 նոյեմբերի – Sputnik. 2024 թ. ՀՀ Սահմանադրական դատարանի աշխատակազմը նախատեսում է հատկացված բյուջեի 90 տոկոսն ուղղել աշխատավարձերի և պարգևավճարների վճարմանը, մնացած 10 տոկոսը` շենքի սպասարկմանը և կոմունալ ծառայությունների վճարմանը։ ՀՀ ԱԺ–ում 2024 թ. պետական բյուջեի նախագծի քննարկմանն այս մասին ասաց ՀՀ Սահմանադրական դատարանի աշխատակազմի ղեկավար Սամվել Առաքելյանը։
Նա ավելացրեց, որ ՍԴ բյուջեն բաղկացած է ընդամենը մեկ ծրագրից, որը ներառում է երեք միջոցառում` ՍԴ գործունեություն և արդարադատության ապահովում, պահուստային ֆոնդ, տեխնիկական հագեցվածության բարելավում։
«Ֆիզիկական և իրավաբանական անձանցից ՍԴ դիմումների թիվն աստիճանաբար ավելանում է։ Դա վկայում է դատարանի նկատմամբ վստահության բարձրացման մասին։ 2023 թ. ՍԴ–ն ստացել է 105 դիմում ֆիզիկական և իրավաբանական անձանցից, 19–ը՝ կառավարությունից, մեկը՝ ՀՀ նախագահից, 2–ը ՝ ԱԺ պատգամավորներից, վեցը՝ դատարաններից»,– տեղեկացրեց նա։
ՀՀ Սահմանադրական դատարանը 2024 թ. համար ներկայացրել է 844 մլն դրամի հայտ, որը, ըստ Առաքելյանի` 11 մլն դրամով պակաս է 2023 թվականից։