ԵՐԵՎԱՆ, 1 նոյեմբերի – Sputnik. ՀՀ պետական վերահսկողության ծառայությունն արդեն 2 օր է` դիտարկում է Արցախից տեղահանված անձանց կարիքներին ուղղված միջոցների բաշխման հետ կապված իրավիճակը։ Այս մասին Պետական վերահսկողության ծառայության պետ Ռոմանոս Պետրոսյանն ասաց ԱԺ–ում լրագրողների հետ ճեպազրույցի ժամանակ։
Նա վստահեցրեց, որ ծառայությունն այս հարցով հատուկ հանձնարարական է ստացել ՀՀ վարչապետ Նիկոլ Փաշինյանից:
«Դիտարկում ենք ինչպես մարզպետարաններին հատկացված միջոցները՝ 3,9 մլրդ դրամ, այնպես էլ աշխատանքի և սոցիալական հարցերի նախարարության ծրագրերը, որոնց ընդհանուր գումարը կազմում է ավելի քան 10 մլրդ դրամ։ Այստեղ ներառված չեն 40 000+10 000–ական, ինչպես նաև 100 000–ական դրամները, որոնք ուղիղ տրամադրվում են արցախահայերին»,– ասաց Պետրոսյանը:
Ծառայության ղեկավարը նշեց, որ մեծ ծավալի աշխատանքներ են տարվում (անձանց նույնականացում, ընտրանքային ստուգումներ), բայց արդյունքների մասին դեռ վաղ է խոսել: Նրա խոսքով՝ ամբողջ գործընթացը լինելու է մշտական վերահսկողության ներքո և առաջիկայում հանրային հաշվետվություն կապահովվի։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցինԵվլախում, սեպտեմբերի 25–ին` Իվանյանում, սեպտեմբերի 29-ին` կրկինԵվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։