ԵՐԵՎԱՆ, 1 նոյեմբերի – Sputnik. 2024 թ. պետական բյուջեի նախագծով ՀՀ նախագահի աշխատակազմին հատկացված գումարների 95 տոկոսից ավելին կծախսվի նախագահի ներկայացուցչական ծախսերի, իսկ 4.8 տոկոսը` գրասենյակի տեխնիկական հագեցվածության բարելավման համար։ ՀՀ ԱԺ–ում 2024 թ. պետական բյուջեի նախագծի քննարկմանն այդ մասին ասաց ՀՀ նախագահի աշխատակազմի ղեկավարի տեղակալ Խաչատուր Պողոսյանը։
Պողոսյանը նշեց, որ ՀՀ նախագահի աշխատակազմի կանոնադրական լիազորությունների իրականացման նպատակով 2024 թ. 2 միջոցառումների ու մեկ ծրագրի համար ներկայացվել է 1 մլրդ 771 մլն 633 հազար դրամի բյուջետային հայտ։
«Ըստ էության` մեր ծրագիրը ապարատի պահպանման ու սպասարկման բյուջե է»,– նշեց նա։
Նրա խոսքով` այս գումարից 82 մլն դրամը նախատեսվում է հատկացնել աշխատակազմի համար նոր ցանցային սարքավորումների և հեռահաղորդակցության համակարգերի ձեռքբերման համար։
«Հին համակարգը շահագործվում է ավելի քան 25 տարի, տեխնիկապես ու բարոյապես մաշված վիճակում է, աշխատում է անընդհատ խափանումներով, վերանորոգման ծախսերը բացարձակապես ոչ արդյունավետ կլինեն»,– ընդգծեց Պողոսյանը։
Նա նաև հայտարարեց, որ ՀՀ նախագահի աշխատակազմը հանդես է գալիս որպես նոր գաղափարների, լուծումների ու նախաձեռնությունների հեղինակ. նպատակն է համագործակցել իշխանության բոլոր ճյուղերի հետ։
«Մեր գործունեությունը միտված է հանրության կողմից ընկալվելու` որպես ապաքաղաքական, կայուն, հեղինակավոր, պրոֆեսիոնալ, վստահելի ինստիտուցիոնալ կառույց և ռազմավարական նախաձեռնությունների կարևոր օղակ»,– տեղեկացրեց ՀՀ նախագահի աշխատակազմի ղեկավարի տեղակալը։
2024 թ. միջոցառումներից նա առանձնացրեց ՀՀ քաղաքացիություն շնորհելու համար արդեն 115 հրամանագրի, 5 դատապարտյալի ներման հրամանագրի, ինչպես նաև` 295 մարդու շքանշաններ ու պարգևներ շնորհելու նախապատրաստման աշխատանքները։