ԵՐԵՎԱՆ, 31 հոկտեմբերի – Sputnik. Ամերիկացի հայտնի ռեփեր Սնուպ Դոգին Երևանում սեպտեմբերի 23-ին նախատեսված համերգի համար շուրջ 2.3 մլրդ դրամն ամբողջությամբ վճարվել է օգոստոսի 25-ին։ Panorama.am-ին այս մասին հայտնել են ՀՀ ֆինանսների նախարարությունից։
«Երևանում սեպտեմբերի 23-ին ամերիկացի հայտնի ռեփեր Սնուպ Դոգի (Snoop Dogg) նախատեսված, բայց հետաձգված համերգի համար ՀՀ կառավարության որոշմամբ ՀՀ պետական բյուջեի միջոցներից «Մշակութային միջոցառումների իրականացնում» ծրագրի շրջանակներում գանձապետարանում հաշվառվել է 2.318.596.800 դրամ գումարի պայմանագիր։ Այդ գումարն օգոստոսի 25-ին ամբողջությամբ վճարվել է»,–նշում է կայքը։
Նաև նշվում է, որ վճարված գումարի վերադարձ չի իրականացվել։
Հիշեցնենք, որ Երևանում սեպտեմբերի 23-ին նախատեսված ամերիկացի հայտնի ռեփեր Սնուպ Դոգի (Snoop Dogg) համերգի մասին հայտարարելուց հետո բուռն քննարկումներ ծավալվեցին հիմնականում համերգի վրա ծախսվելիք պետական գումարների շուրջ։ Սնուպ Դոգի համերգը չեղարկվեց Արցախի Հանրապետությունում տեղի ունեցած ողբերգական դեպքերով պայմանավորված։ Սնուպ Դոգը գումարը չի վերադարձրել ու չի վերադարձնի։