ԵՐԵՎԱՆ, 31 հոկտեմբերի – Sputnik. 2024 թվականի բյուջեով ՀՀ տարածքային կառավարման և ենթակառուցվածքների նախարարությունը 120 միլիարդ դրամ հատկացրել է տրանսպորտային ոլորտին։ Այս մասին բյուջեի նախագիծը ներկայացնելիս ասաց նախարար Գնել Սանոսյանը։
Նա նշեց, որ 120 միլիարդից 119.2 միլիարդը հատկացված է ճանապարհային ցանցի բարելավմանը, որտեղ հիմնական գումարը նախատեսված է կապիտալ ծրագրերի համար։
«Բավական խոշոր հատկացումներ ունենք հատկապես «Հյուսիս–հարավի» մասով։ 2024 թվականին նախատեսված է 42.5 միլիարդ դրամ «Հյուսիս–հարավի» տարբեր հատվածներում շինարարություններ սկսելու կամ շարունակելու առումով»,–ասաց Սանոսյանը։
Նախարարը նաև հայտնեց, որ գումարներ ունեն նախատեսված ավիացիայի համար, որը 578 միլիոն դրամ է կազմում։
«Սա ոլորտի պահպանման ծախսերն են, բնագավառի վերահսկողության, կանոնակարգման, աշխատակիցների վերապատրաստման և նմանատիպ ծախսերի համար նախատեսված»,–հավելեց նա։
Նախարարը նշեց, որ 327 միլիոն դրամ էլ նախատեսված է երկաթուղու համար, որն ամեն տարի պայմանագրի համաձայն սուբսիդավորում են։
Նշենք, որ «Հյուսիս-հարավ» ճանապարհային միջանցքը Հայաստանում իրականացվող խոշոր ենթակառուցվածքային ծրագիր է, որի նպատակն է հարևան երկրների հետ հաղորդակցման դյուրինացումը, Կենտրոնական Ասիա, Եվրոպա ձգվող հաղորդակցության ուղիներով դեպի արտաքին շուկաներ ելքի հնարավորությունների ընդլայնումը, տնտեսության հիմնական ոլորտների զարգացումն ու արտահանման ընդլայնումը և այլն:
Ռազմավարական կարևոր նշանակություն ունեցող այս ճանապարհի կառուցումը կապահովի Հայաստանի հարավային սահմանից դյուրին երթևեկությունը մինչև Վրաստանի սահման, ապա նաև դեպի սևծովյան նավահանգիստներ։ Դա թույլ կտա իրականացնել բարձր չափանիշներին համապատասխանող բեռնափոխադրումներ և ուղևորափոխադրումներ, զարգացման լուրջ հնարավորություններ կընձեռի Հայաստանի հարավից հյուսիս ընկած բոլոր բնակավայրերին: