ԵՐԵՎԱՆ, 31 հոկտեմբերի - Sputnik. Այս պահի դրությամբ ՀՀ տնտեսական աճի պոտենցիալը (տնտեսության ճյուղերի ամբողջ կարողությունը, զարգացման բոլոր հնարավորությունները) կազմում է 5.5 տոկոս։ ՀՀ Ազգային ժողովում 2024 թ. պետական բյուջեի նախագծի քննարկման ժամանակ ասաց ՀՀ ֆինանսների նախարար Վահե Հովհաննիսյանը։
«Հայաստան» խմբակցության պատգամավոր Արթուր Խաչատրյանը, նրան հարց ուղղելով, նշեց, որ տնտեսական աճին նպաստում են հիմնականում արտաքին գործոնները:
«Եթե փորձենք զտել ներքին ու արտաքին գործոնները, որոնք ազդում են տնտեսական աճի վրա, եթե միջինացնենք տնտեսական արտաքին պայմանները, վերջին 5 տարվա կտրվածքով մեր տնտեսական աճը որքա՞ն կլիներ»,– նշեց պատգամավորը:
Ֆինանսների նախարարը պատասխանեց` ասելով, սովորաբար գնահատվում է, որ Հայաստանի Հանրապետության տնտեսական պոտենցիալը կազմում է 5.5 տոկոս:
«Այս պոտենցիալից են կախված այն կապիտալ ներդրումները, որոնք մենք իրականացնում ենք: Այդ պոտենցիալի մեծությունը կախված է ներդրումներից, մեր տնտեսության դիվերսիֆիկացիայից և այն բարեփոխումներից, որոնք մենք իրականացնում ենք»,– ընդգծեց նախարարը:
Ինչ վերաբերում է ՀՀ պետական պարտատոմսերին, ապա ըստ Հովհաննիսյանի, դրանց պահանջարկի ու հետաքրքրության շեշտակի բարձրացում ունենք, որը նա պայմանավորեց ՀՀ կառավարության քայլերով, որոնք նպաստում են ՀՀ միջազգային վարկանիշի բարձրացմանը։ Ըստ նախարարի` այն իր հերթին բերում է նաև տոկոսադրույքների նվազման։