ԵՐԵՎԱՆ, 31 հոկտեմբերի – Sputnik. Պաղեստինյան ՀԱՄԱՍ շարժման ռազմական թևը` «Ալ Քասամը», հայտարարել է, որ շուտով ազատ կարձակեն Գազայի հատվածում գտնվող մի շարք օտարերկրյա պատանդների: Տեղեկությունը հայտնում է ՌԻԱ Նովոստին` հղում անելով արաբական հեռուստաալիքներին։
«Մենք միջնորդներին հայտնել ենք, որ առաջիկա օրերին ազատ կարձակենք մի շարք օտարերկրացիների»,- ասել է «Ալ Քասամ» բրիգադի ներկայացուցիչ Աբու Օբեյդան:
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։
Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ավիահարվածներ է հասցնում օդից, ծովից և ցամաքից։
Տարբեր տվյալներով՝ ՀԱՄԱՍ-ը շուրջ 150 իսրայելցու է գերեվարել։ Շարժումը հայտարարել է, որ Գազայի հատվածում մոտ 200-250 պատանդ կա։