ԵՐԵՎԱՆ, 31 հոկտեմբերի – Sputnik. Գազայում շուրջ 940 երեխա անհետ կորած է համարվում։ Նրանք, հավանաբար, հայտնվել են փլատակների տակ, երեք շաբաթների ընթացքում մոտ 3450 երեխա էլ սպանվել է։ Այս մասին, ՌԻԱ Նովոստիի փոխանցմամբ, Ժնևում հրավիրված ճեպազրույցի ժամանակ հայտարարել են ՄԱԿ–ի մանկական հիմնադրամի մամուլի քարտուղար Ջեյմս Էլդերը և ՄԱԿ–ի հումանիտար հարցերի համակարգման վարչության ներկայացուցիչ Յենս Լաերկեն։
«Վերջին տվյալներով` Գազայում 940 երեխա է անհետ կորել», – ասել է Էդլերը լրագրողներին։
ՄԱԿ–ի հումանիտար հարցերի համակարգման վարչության ներկայացուցիչը հավելել է, որ իր կազմակերպությունը նույն տվյալներն ունի, և որ «անտանելի է մտածել փլատակների տակ մնացած երեխաների մասին այն դեպքում, երբ շատ քիչ շանս կա նրանց դուրս բերելու»։
ՄԱԿ–ի մանկական հիմնադրամի տվյալներով` Գազայում երեք շաբաթվա ընթացքում 3450 երեխա է սպանվել և ավելի քան 10 հազարը վիրավորում են ստացել։ Կազմակերպությունը հիշեցրել է նաև, որ Գազայի 2.3 մլն բնակչության կեսը 18–ից ցածր տարիքի են։
«Այդ թիվն օրեցօր զգալի ավելանում է։ Գազան երեխաների գերեզմանոցի է վերածվել։ Դա դժոխք է մյուսների համար։ Երեխաներին հասցվող վտանգը ավելի է, քան ռումբերի և ականանետերի հասցված վտանգը», – նշել է Էլդերը։
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։
Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ավիահարվածներ է հասցնում օդից, ծովից և ցամաքից։