Պուշկինի թանգարանում բացվել է «Ուրարտուի թագավորությունը» ցուցահանդեսը․ լուսանկարներ

ԵՐԵՎԱՆ, 30 հոկտեմբերի - Sputnik. «Ուրարտուի թագավորությունը. Հին Հայաստանի ժառանգությունը: Ուրաշու-Հարմինույա-Արմինա» ցուցահանդեսը բացվել է Մոսկվայի Ա. Ս. Պուշկինի անվան կերպարվեստի պետական թանգարանում:

«Ուրախ եմ ողջունել ձեզ Ուրարտուի Թագավորությունը» ցուցահանդեսի բացմանը»,- ասել է թանգարանի տնօրեն Ելիզավետա Լիխաչովան՝ շնորհակալություն հայտնելով էքսպրոմտի բոլոր ստեղծողներին, ինչպես նաև Ռուսաստանի մշակույթի և արտաքին գործերի նախարարությանը:

Հայաստանի պատմության թանգարանի տնօրեն Դավիթ Պողոսյանն ընդգծել է նման ցուցադրության կարևորությունը Ռուսաստանի և Հայաստանի միջև հարաբերությունների համար` նշելով, որ համագործակցությունը պետք է շարունակել:

«Մեզ համար մեծ պատիվ է մասնակցել Ուրարտուի ժառանգությանը նվիրված մեծածավալ ցուցահանդեսի բացման արարողությանը... Հայաստանի պատմության թանգարանի համար կարևոր էր, որ ցուցահանդեսում ներկայացվեին նախաուրարտականից մինչև հետուրարտական շրջանը, ինչը վկայում է հնագույն Ուրարտու պետության պատմության շարունակականության մասին», - ասել է Պողոսյանը:

Ցուցադրությունը նվիրված է հին Հայաստանի մշակութային պատմությանը և յուրահատուկ տեսակետ է ներկայացնում դրա արվեստի ակունքներին՝ Ուրարտու պետության ժառանգությանը (մ.թ.ա. IX – VII դարեր): Այն պատմում է տարածաշրջանի պատմության և մշակույթի զարգացման փուլերի մասին՝ Հայկական լեռնաշխարհի հնագույն ցեղերի նախաուրարտական ավանդույթից (մ.թ.ա. II–I հազարամյակներ) մինչև հետուրարտական շրջանի հին հայկական արվեստի ձևավորումը (մ. թ. ա. VI–IV դարեր):

«Էրեբունի» պատմահնագիտական արգելոց-թանգարանի տնօրեն, ցուցահանդեսի համակարգող Միքայել Բադալյանն իր հերթին նշել է դրա նշանակությունը հայ-ռուսական համագործակցության համար:

Ցուցահանդեսը նվիրված է արևելագետ, Մոսկվայի պետական համալսարանի Հին Արևելքի բաժնի վարիչ (1964-2008) և Պուշկինի թանգարանի հնագիտական ջոկատի երկարամյա ղեկավար (1959-1978) Սվետլանա Խոջաշի 100-ամյա հոբելյանին:

Ցուցահանդեսը լայն հանրության համար բաց կլինի հոկտեմբերի 31-ից մինչև հաջորդ տարվա հունվարի 28-ը: