ԵՐԵՎԱՆ, 30 հոկտեմբերի – Sputnik. Հայաստանում մակրոտնտեսական կայունության համար ամենամեծ սպառնալիքներից մեկը կոռուպցիայի հնարավոր վերակտիվացումն է։ ՀՀ վարչապետ Նիկոլ Փաշինյանն այս հայտարարությունն արեց Ազգային ժողովի մշտական հանձնաժողովների նիստում 2024 թվականի պետական բյուջեի նախագծի քննարկումների ժամանակ։
«Մենք պետք է մեր սկզբունքային պայքարն ավելի խորացնենք կոռուպցիայի դեմ։ Մենք մտահոգված ենք այն տեղեկություններով, որ ամենատարբեր տեղերում, ամենատարբեր մակարդակներով, կաշառքներով, կոռուպցիոն եղանակներով ՀՀ–ում դեռևս հնարավոր է հարցեր լուծել։ Ես ուզում եմ վերահաստատել մեր քաղաքական կամքը որևէ ճգնաժամ, որևէ ցնցում չի կարող հակակոռուպցիոն պայքարը թուլացնել»,–ասաց նա ։
ՀՀ վարչապետն ընդգծեց, որ դա ազգային անվտանգության, պետության շահերի հարց է։ Նրա խոսքով` այսօր Հայաստանում կոռուպցիայի դեմ պայքարը նույնքան հրատապ է, որքան 2018-19 թվականներին։
«Այս հարցում, ինչպես և նախկինում, ներում–բեկում չի լինելու»,– ասաց նա։
Հիշեցնենք` ՀՀ հակակոռուպցիոն կոմիտեի նախագահ Սասուն Խաչատրյանը մայիսին հայտարարել էր, որ Հայաստանում արձանագրվում է կոռուպցիոն բնույթի հանցագործությունների աճ, սակայն դա, ըստ նրա, դրական ցուցանիշ է, քանի որ բացահայտումներն են շատացել։