ԵՐԵՎԱՆ, 29 հոկտեմբերի – Sputnik. Պաղեստինյան Կարմիր մահիկի Ալ Քուդս հիվանդանոցի ղեկավարությունը իսրայելցի զինվորականներից նախազգուշացում է ստացել հիվանդանոցը հարվածելու մտադրության մասին, որտեղ, բացի 400 հիվանդից, Գազայի հատվածի մոտ 12 հազար բնակիչ է ապաստան գտել ռմբակոծությունից։
«Ալ Քուդսի հիվանդանոցը իսրայելական զինվորականներից հրաման է ստացել անհապաղ տարհանել մարդանց, քանի որ նրանք մտադիր են հարձակում գործել»,- ասվում է պաղեստինյան Կարմիր մահիկի «X» սոցցանցում տարածած հայտարարության մեջ:
Հիվանդանոցի տվյալներով՝ այժմ դրա տարածքում, բացի 400 հիվանդից, կա Գազայի հատվածի մոտ 12 հազար բնակիչ, ովքեր այնտեղ ապաստան են գտել շարունակվող ինտենսիվ ռմբակոծություններից։
Գազայի քաղաքացիական պաշտպանության ծառայության տվյալներով՝ փրկարարները, անկլավում հաղորդակցությունների մասնակի վերականգնումից հետո, ռմբակոծված 20 տարբեր վայրերից սկսել են հաղորդագրություններ ստանալ՝ օգնություն խնդրանքով։
Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին:
Գազայի հատվածում զոհերի թիվը, ըստ տեղի առողջապահության նախարարության, գերազանցել է 7,3 հազարը, վիրավորում է ստացել ավելի քան 18 հազար մարդ:
Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ուժեղ ավիահարվածներ է հասցնում օդից, ծովից և ցամաքից։