Իսրայելը հարվածներ է հասցրել Գազայի հատվածի «Ալ Քուդս» հիվանդանոցի արվարձաններին

ԵՐԵՎԱՆ, 29 հոկտեմբերի – Sputnik. Իսրայելը հարվածներ է հասցրել Գազայի հատվածի «Ալ Քուդս» հիվանդանոցի արվարձաններին, որտեղ ապաստանել է մոտ 12 հազար մարդ, հայտնում է ՌԻԱ Նովոստին՝ հղում անելով Պաղեստինի ՆԳՆ տեղեկատվությանը։

Այսօր Պաղեստինի Կարմիր մահիկը հայտնել էր, որ «Ալ Քուդս» հիվանդանոցի ղեկավարությունը նախազգուշացում է ստացել իսրայելական զինվորականներից, որ նրանք մտադիր են հարձակվել հիվանդանոցի վրա։

Պաղեստինյան Կարմիր մահիկը ավելի վաղ հայտնել էր, որ հիվանդանոցում ապաստան է գտել մոտ 12 հազար մարդ:

Հիշեցնենք` հոկտեմբերի 7-ի առավոտյան Իսրայելը Գազայի հատվածից աննախադեպ հրթիռային հարձակման ենթարկվեց։ Իսրայելի բանակի մամուլի ծառայությունից հայտնեցին, որ ծայրահեղականներն ավելի քան 3 հազար հրթիռ են արձակել: Բացի այդ, տասնյակ ահաբեկիչներ ներխուժել են Իսրայելի հարավում գտնվող սահմանամերձ շրջաններ։ Պաղեստինյան ՀԱՄԱՍ շարժման ռազմական թևը հայտարարեց, որ Իսրայելի դեմ «Ալ Աքսայի ջրհեղեղ» գործողություն է անցկացնում: Իսրայելի պաշտպանության բանակն էլ (ՑԱԽԱԼ) հայտնեց Գազայի հատվածում ՀԱՄԱՍ-ի դեմ «Երկաթե թրեր» գործողության մեկնարկի մասին։

Հոկտեմբերի 27–ի երեկոյան իսրայելական ուժերը մտել են Գազայի հատված։ Իսրայելն ուժեղ ավիահարվածներ է հասցնում օդից, ծովից և ցամաքից։