ԵՐԵՎԱՆ, 28 հոկտեմբերի – Sputnik. Հայաստանի Հանրապետությունում պարեկային ծառայություն հիմնադրելու համար ընդհանուր առմամբ ծախսվել է 29 մլրդ դրամ։ Ինչպես հայտնում է ՀՀ վարչապետի աշխատակազմի մամուլի ծառայությունը, այս մասին Արարատի մարզի ստորաբաժանման աշխատանքի մեկնարկին նվիրված միջոցառմանը հայտարարել է ՀՀ վարչապետ Նիկոլ Փաշինյանը։
Նա ընդգծել է, որ պարեկային ոստիկանության հիմնադրման հարցում ՀՀ կառավարությանը մեծ աջակցություն են ցուցաբերել միջազգային գործընկերները։
«Պարեկային ոստիկանության հիմնադրման համար, ընդհանուր առմամբ, ծախսվել է 29 մլրդ դրամ։ Այդ 29 մլրդ դրամից 20 մլրդը ծախսվել է Հայաստանի Հանրապետության պետական բյուջեից, 6 մլրդ դրամը տրամադրել է ԱՄՆ–ն, 3 մլրդ–ը` ԵՄ–ն։ Ցանկանում եմ մեր գործընկերներին և Հայաստանի Հանրապետության բոլոր հարկ վճարողներին շնորհակալություն հայտնել այս գործընթացն իրականություն դարձնելու համար»,– ասել է Փաշինյանը։
ՀՀ վարչապետն իր խոսքում հույս է հայտնել, որ Արարատի մարզի բնակիչներն այս ստորաբաժանման նորամուտից հետո իրենց ավելի պաշտպանված կզգան։ Նա վստահեցրել է` պարեկային ոստիկանության հիմնադրմամբ Հայաստանում ներդրվում է շատ կարևոր ինստիտուտ, որով ամրապնդվում է պետությունը։
Արարատի մարզում պարեկային ծառայության աշխատանքի մեկնարկին նվիրված միջոցառումը
Փաշինյանը տեղեկացրել է` առաջիկայում պարեկային ոստիկանությունում նոր ընդունելություն է կազմակերպվելու 300 նոր ծառայողով համալրվելու համար, և նրանց շուրջ 80 տոկոսը լինելու են կանայք։ ՀՀ վարչապետը հույս է հայտնել, ործառայող կանայք իրենց անձնվեր աշխատանքով, օրինակով կքաջալերեն նաև մյուսներին։
Միջոցառմանը ներկա են գտնվել նաև ՀՀ ներքին գործերի նախարար Վահե Ղազարյանը, տարածքային կառավարման և ենթակառուցվածքների նախարար Գնել Սանոսյանը, արտերկրի դիվանագիտական ծառայությունների ներկայացուցիչներ և այլ պաշտոնատար անձինք:
Հիշեցնենք, որ այսօր ավելի վաղ Փաշինյանը մասնակցել էր Արմավիրի մարզի ստորաբաժանման աշխատանքի մեկնարկին նվիրված միջոցառմանը։
Պարեկային ծառայությունն առաջինը ներդրվել է Երևանում` 2021 թվականին։ Հուլիսի 7-ին վերապատրաստված պարեկային 700 ծառայող առաջին անգամ դուրս էր եկել հասարակական անվտանգությունն ապահովելու համար։
Պարեկային ծառայության մասին ՀՀ օրենքով նախատեսված է, որ ծառայության հաստիքների 30 տոկոսը պետք կանայք զբաղեցնեն։