ԵՐԵՎԱՆ, 28 հոկտեմբերի – Sputnik. Արցախի Հանրային հեռուստաընկերությանը տված հարցազրույցում Արցախի նախագահ Սամվել Շահրամանյանն ասաց` ինչպես է ինքը հասել Հայաստան` անդրադառնալով հարցին, թե ինչպես է անցել Լաչինի միջանցքում տեղադրված անցագրային կետը։
«Ես տեղափոխվել եմ ուղղաթիռով։ Եղել ենք ես, պաշտպանության նախարարը և իմ անվտանգության 2 աշխատակիցը։ Սիսիան ուղղաթիռով ենք հասել»,– ասաց Շահրամանյանը։
Նա մեկնաբանեց նաև, թե ինչպես է ստացվել, որ ադրբեջանկան կողմն առևանգել է Արցախի 3 նախկին նախագահին, իսկ իրեն բաց թողել։
«Առաջին հերթին, ադրբեջանական կողմը ցուցաբերում էր ընտրովի մոտեցում։ Չեմ կարող ասել, թե ինչու է Ադրբեջանը նման որոշում կայացրել, բայց կարծում եմ, որ այդ մարդիկ ձերբակալվել և Բաքու են տեղափոխվել քաղաքական նպատակներով»,– ասաց Շահրամանյանը։
Հիշեցնենք` ադրբեջանցի սահմանապահները ձերբակալել են Արցախի նախկին պետնախարար, բարերար Ռուբեն Վարդանյանին, ՊԲ նախկին հրամանատար Լևոն Մնացականյանին, ՊԲ հրամանատարի նախկին տեղակալ Դավիթ Մանուկյանին, Արցախի նախկին արտգործնախարար Դավիթ Բաբայանին, ԼՂ ԱԺ նախագահ Դավիթ Իշխանյանին, Արցախի նախկին նախագահներ Արկադի Ղուկասյանին, Բակո Սահակյանին, Արայիկ Հարությունյանին։ Վերջինին, ի դեպ, Բաքվում ցմահ ազատազրկում է սպառնում։