ԵՐԵՎԱՆ, 27 հոկտեմբերի – Sputnik. «Խաղաղության խաչմերուկ» ծրագրի իրականացումը կարող է Հայաստանի վախճանը հանդիսանալ։ Այս մասին այսօր Եռաբլուրում լրագրողների հետ զրույցում հայտարարեց ԱԺ «Հայաստան» խմբակցության ղեկավար Սեյրան Օհանյանը:
«Այս իրականության մեջ ստեղծել «Խաղաղության խաչմերուկ» և գնալ սեղմել քո թշնամու ձեռքը, համարում եմ` տեղին չէ: Ես գտնում եմ, որ այս ծրագիրը, որ ինքը (Նիկոլ Փաշինյանը–խմբ.) ներկայացնում է, եթե մտածված չլինի, եթե ՀՀ շահերը առաջ չտարվեն, դա կարող է նաև մեզ համար վախճան հանդիսանալ»,–ասաց նա։
Սերյան Օհանյանը հիշեցրեց, որ Արցախում ցեղասպանություն իրականացնելուց հետո Ադրբեջանի հաջորդ նպատակը Մեծ Թուրանն է, որը ըստ Օհանյանի թուրք-ադրբեջանական տանդեմը փորձում է իրականացնել Հայաստանի վրայով:
«Երբ հակառակորդը քեզ ճնշում է, քո համերկրացիներին, քո հայրենիքի մի մասը բռնագաղթեցրել է, ցեղասպանություն է իրականացրել, ծեր, մանուկ, զինվորական ոչնչացրել է, ապօրինի հակաահաբեկչական գործողություններ է իրականացրել... Այս պարագայում խոսել «Խաղաղության խաչմերուկի» մասին տեղին չէ»,– հավելեց նա։
Հիշեցնենք, որ երեկ Թբիլիսիի «Մետաքսի ճանապարհ» համաժողովում Նիկոլ Փաշինյանը ներկայացրել է «Խաղաղության խաչմերուկ» նախագծի կոնցեպտը, որի առանցքում Հայաստանի, Թուրքիայի, Ադրբեջանի և Իրանի միջև ենթակառուցվածքների զարգացումն է, և որը նրա գնահատմամբ կդառնա Հարավային Կովկասում խաղաղության անբաժանելի մասը։
Փաշինյանը նշել է, որ մոտ ապագայում կառավարության կողմից մշակված «Խաղաղության խաչմերուկ» ամբողջական նախագիծը կներկայացվի տարածաշրջանի բոլոր երկրներին։ Փաշինյանը հույս ունի, որ համատեղ ջանքերով դա հնարավոր կլինի իրականացնել։