ԵՐԵՎԱՆ, 27 հոկտեմբերի – Sputnik. Հայաստանի ֆուտբոլի ֆեդերացիայի նախագահի առաջիկա ընտրությունները կարող են անկանխատեսելի ընթացք ստանալ: Այս մասին «Ժողովուրդ» օրաթերթին հայտնել են իշխանություններին մոտ կանգնած աղբյուրները։
«Մեզ փոխանցում են, որ կուլիսներում, որպես ՀՖՖ նախագահի թեկնածու, քննարկվել է ԱԺ պատգամավոր Սիսակ Գաբրիելյանի անունը: Լուրեր կան, որ նրա լոբբինգով զբաղվել է ԱԺ նախագահ Ալեն Սիմոնյանը: Այս անձի թեկնածության հետագա ճակատագրի հետ կապված հստակություն ներկա պահին չկա. զուգահեռ քննարկվում է նաեւ Աննա Հակոբյանի հիմնադրամի ղեկավար, սփյուռքի կոմիտեի նախկին ղեկավար Մխիթար Հայրապետյանի անունը, որի թեկնածությունն այս պահին կարծես ավելի հավանական է»,–գրում է թերթը։
Նշվում է, որ իշխանական կուլիսներում տևական ժամանակ է, ինչ հասունանում է դժգոհություն ՀՖՖ գործող ղեկավարությունից. պատճառներից մեկը հայկական ֆուտբոլի ողբալի վիճակն է, տարբեր տարիքային հավաքականների խայտառակ պարտություններն ու ազգային թիմի, մեղմ ասած, ոչ ստաբիլ խաղը։
«Մեր աղբյուրները հայտնում են, որ եթե սկզբնական քննարկումներում Նիկոլ Փաշինյանը դեմ է եղել Արմեն Մելիքբեկյանին փոխարինելու գաղափարին, ապա այժմ հրահանգել է սպասել, մինչեւ տեսնեն՝ հավաքականն ինչպես կավարտի «Եվրո 2024»-ի նախընտրական վերջին երկու խաղերը Ուելսի ու Խորվաթիայի հավաքականների դեմ»,–գրում է «Ժողովուրդը»։
Հավելենք, որ ՀՖՖ նախագահի ընտրությունները կկայանան դեկտեմբերին։