ԵՐԵՎԱՆ, 27 հոկտեմբերի – Sputnik. Եվրամիությունը կշարունակի իր միջնորդական ջանքերը Հայաստանի և Ադրբեջանի միջև բանակցություններում: Այս մասին ասել է Եվրոպական խորհրդի ղեկավար Շառլ Միշելը՝ Բրյուսելում ԵՄ գագաթնաժողովից հետո կայացած ասուլիսում։ Տեղեկությունը հայտնում է ՌԻԱ Նովոստին։
Միշելը հայտարարել է, որ ԵՄ գագաթնաժողովում եվրոպացի առաջնորդները մտքեր են փոխանակել Հարավային Կովկասում տիրող իրավիճակի շուրջ և նշել, որ Եվրամիությունը մտադիր է շարունակել իր միջնորդական դերը:
«Մենք քննարկել ենք իրավիճակը Հարավային Կովկասում։ Վճռականորեն ենք տրամադրված շարունակել գործել որպես միջնորդներ՝ նպաստելու Եվրամիության աջակցությամբ Ադրբեջանի և Հայաստանի միջև հարաբերությունների կարգավորմանը, որը հիմնված է տարածքային ամբողջականության և ինքնիշխանության փոխադարձ ճանաչման սկզբունքների վրա», - ասել է Միշելը:
Եվրոպական խորհրդի ղեկավարը նշել է, որ ԵՄ երկրների առաջնորդները միակարծիք են Բրյուսելի միջնորդական ջանքերի հարցում:
Հիշեցնենք` ավելի վաղ հաղորդվել էր, որ Եվրոպական խորհրդի նախագահ Շառլ Միշելի, ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի մասնակցությամբ եռակողմ հանդիպում է նախատեսվում հոկտեմբերի վերջին Բրյուսելում։
Հոկտեմբերի 25-ին Հարավային Կովկասի և Վրաստանում ճգնաժամի հարցերով ԵՄ հատուկ ներկայացուցիչ Տոյվո Կլաարն APRI Armenia վերլուծական կենտրոնի` «Առաջընթաց անորոշության պայմաններում» խորագրով համաժողովի ժամանակ հայտարարել է, որ Բրյուսելում նախատեսված հանդիպումը տեղի չի ունենա։
ՀՀ ԱԳ նախարար Արարատ Միրզոյանը, մեկնաբանելով հանդիպման չեղարկումը, ասել է, թե ակնհայտ է, որ Բրյուսելում նախատեսված հանդիպումը չի կայացել, որովհետև Ադրբեջանի նախագահ Իլհամ Ալիևը ժամանակ չի ունեցել։
Նշենք, որ Ադրբեջանը հրաժարվել էր մասնակցել նաև հոկտեմբերի 5-ի Գրանադայի գագաթաժողովին։