ԵՐԵՎԱՆ, 26 հոկտեմբերի – Sputnik. ԵԱՏՄ տարածքում ապրանքների ծագման կանոնների մասին համաձայնագրի լրամշակված տարբերակը շուտով կրկին կներկայացվի ստորագրման։ Sputnik միջազգային մուլտիմեդիոն կենտրոնում կայացած ճեպազրույցում այս մասին հայտնեց Եվրասիական տնտեսական հանձնաժողովի պաշտոնական ներկայացուցիչ Իյա Մալկինան՝ անդրադառնալով ԵԱՏՄ միջկառավարական խորհրդի նիստի արդյունքներին։
Համաձայնագրի նախագիծը մի շարք հարցեր է առաջացրել, որոնք մինչև վերջ դեռ չեն քննարկվել, ուստի համաձայնագրի մասին մանրամասներ դեռ չեն հաղորդվում:
Բայց ընդհանուր առմամբ, ըստ Մալկինայի, կարելի է փաստել, որ այն կներկայացնի ԵԱՏՄ երկրների ընդհանուր մոտեցումները երրորդ երկրների շուկաներ մուտք գործելու հարցում, ինչպես նաև կստեղծի միասնական մոտեցում, որի հիման վրա երկրները կլուծեն պետության ներսում ծագող իրավական հարցերը արտահանման ձևակերպման ժամանակ։
«Մենք սպասում ենք ստորագրմանը։ Մեզ մի փոքր էլ ժամանակ տվեք, բառացիորեն գուցե մեկ շաբաթ, ու մենք կպատմենք, թե ինչ է կարգավորում այդ համաձայնագիրը, ինչ հիմնական պայմանավորվածություններ են ձեռք բերվել պետությունների միջև», – ավելացրել է Մալկինան:
Նշենք, որ 2023 թվականի հունվար-օգոստոսին Հայաստանից արտահանումն աճել է գրեթե 52%-ով, այդ թվում՝ դեպի ԵԱՏՄ երկրներ՝ 2,2 անգամ, երրորդ երկրներ՝ մոտ 18%-ով։ ԵՄ երկրներ արտահանումը կրճատվել է 5,3 տոկոսով, դեպի ԱՄՆ՝ գրեթե 40 տոկոսով, իսկ դեպի Արաբական Միացյալ Էմիրություններ արտահանումն աճել է 2,6 անգամ։