ԵՐԵՎԱՆ, 26 հոկտեմբերի – Sputnik. Եվրասիական տնտեսական միության ներսում առևտրային խոչընդոտների մեծ մասը վերջին մեկ տարվա ընթացքում վերացվել է։ ԻՆչպես տեղեկացնում է Sputnik Բելառուսը, Բիշքեկում լրագրողների հետ զրույցում այս մասին ասել է Բելառուսի վարչապետ Ռոման Գոլովչենկոն։
Բելառուսի կառավարության ղեկավարը նշել է, որ Եվրասիական միջկառավարական խորհրդի նեղ կազմով նիստը կայացել է փակ դռների հետևում: Նրա խոսքով՝ այդպիսի ձևաչափով միշտ քննարկվում են «զգայուն հարցերը», որոնք կապված են տնտեսական պարամետրերի, ամբողջովին չկարգավորված հարցերի հետ։
«Մենք արձանագրել ենք, որ մեկ տարվա աշխատանքի ընթացքում փոխադարձ առևտրում հայտնաբերված 11 արգելքներից 8-ը վերացվել են։ Հեշտ լուծվող հարցեր չէին, բայց լուծվել են»,-ասել է Գոլովչենկոն։
Եվրասիական տնտեսական միությունը միջազգային ինտեգրացիոն տնտեսական միավորում է, որը գործում է 2015 թվականի հունվարի 1-ից: Միության անդամներ են Ռուսաստանը, Հայաստանը, Բելառուսը, Ղազախստանը և Ղրղզստանը։