ԵՐԵՎԱՆ, 26 հոկտեմբերի – Sputnik. Ազատ առևտրի համաձայնագիրը կօգնի զարգացնել Իրանի հետ տրանսպորտային կապերը։ Հայաստանի փոխվարչապետ Մհեր Գրիգորյանն այս մասին ասել է Բիշքեկում ԱՊՀ կառավարությունների ղեկավարների խորհրդի և Եվրասիական միջկառավարական խորհրդի ընդլայնված կազմով հանդիպման ժամանակ։
«Ինչ վերաբերում է տարածաշրջանային գործընկերների հետ հարաբերություններին, ապա պետք է նշեմ, որ Եվրասիական տնտեսական միության և Իրանի միջև կնքված ազատ առևտրի համաձայնագիրը կնպաստի Իրանի հետ ոչ միայն առևտրատնտեսական, այլև լոգիստիկ և տրանսպորտային կապերի ընդլայնմանը»,- ասել է Գրիգորյանը։
Նա հանդիպման մասնակիցներին տեղեկացրել է, որ Հայաստանն աշխատում է Իրանի հետ սահմանին գտնվող Մեղրի քաղաքի մաքսակետի արդիականացման նախագծի վրա։
Ավելի վաղ Հայաստանի պետական եկամուտների կոմիտեից Sputnik Արմենիային հայտնել էին, որ «Մեղրի» սահմանային անցակետի արդիականացման գործընթացը կավարտվի 2026 թվականին։