ԵՐԵՎԱՆ, 25 հոկտեմբերի – Sputnik. Կրեմլին հայտնի չէ, որ ՀՀ վարչապետ Նիկոլ Փաշինյանը հայտարարել է Հայաստանի ռուսական ռազմաբազայի առկայության առավելությունների բացակայության մասին։ «Ինտերֆաքսի» հետ զրույցում այս մասին ասել է ՌԴ նախագահի մամուլի քարտուղար Դմիտրի Պեսկովը։
Ահա թե որտեղ են թաքնված բոլոր հարցերը. Փաշինյանը` թուրք հարևանների հետ ՀՀ կապերի մասին
«Մենք դեռ չգիտենք` նա այդ խոսքերն ասել է, թե ոչ, և եթե ասել է, ապա որտեղ, ինչ կոնտեքստում։ Մենք նման տվյալներ չունենք»,– ասել է Պեսկովը` մեկնաբանելով Wall Street Journal-ի հրապարակումը։
Նշենք, որ այսօր հայտնի դարձավ` ՀՀ վարչապետ Նիկոլ Փաշինյանը հարցազրույց է տվել ամերիկյան Wall Street Journal–ին։ Պարբերականը որոշ հատվածներ էր հրապարակել հարցազրույցից։
Հրապարակված դրվագներում Փաշինյանը նշում է, որ Ռուսաստանի Դաշնության խաղաղապահ զորախումբը չի կարողացել կամ չի ցանկացել ապահովել Լեռնային Ղարաբացի հայության անվտանգությունը։ Ըստ նրա` այս իրադարձությունները, ըստ էության, հանգեցրել են մի որոշման, որ Հայաստանը պետք է դիվերսիֆիկացնի հարաբերություններն անվտանգության ոլորտում։
Նա հայտարարել է նաև, որ որևէ առավելություն չի տեսնում Հայաստանում ռուսական ռազմաբազաների շարունակական ներկայության մեջ։