ԵՐԵՎԱՆ, 25 հոկտեմբերի – Sputnik. ԼՂ–ից ՀՀ զենք–զինամթերք է ներմուծվել, և այդ մասին ՀՀ ՆԳՆ–ն տեղյակ է։ Ազգային ժողովում ՀՀ կառավարության հետ հարցուպատասխանի ժամանակ այս մասին ասաց ՀՀ ՆԳ նախարար Վահե Ղազարյանը։
«Կան մարդիկ, որոնք արդեն կամավոր դրանք բերում, հանձնում են։ Երեք օրվա ընթացքում 4 միավոր ատրճանակ և երկու միավոր հարթափող զենք են բերել հանձնել ԼՂ բնակիչները»,– հայտարարեց նա։
Նախարարի խոսքով` ոստիկանապետի կողմից տրվել են համապատասխան ցուցումներ, բացատրական աշխատանքներ են տարվել և կոչ է արվել անօրինական զենքերը բերել ու հանձնել իրավապահ մարմիններին։
Ղազարյանը ևս մեկ անգամ տեղեկացրեց` եթե կամավոր են բերում, հանձնում զենքը, ապա ազատվում են քրեական պատասխանատվությունից։
Հիշեցնենք` Ադրբեջանը սեպտեմբերի 19–ին լայնամասշտաբ հարձակում սկսեց Արցախի դեմ։ Ըստ տեղեկությունների` ադրբեջանական ագրեսիայի զոհերի թիվը գերազանցում է 220-ը։
Սեպտեմբերի 20–ին Արցախի իշխանությունն ընդունեց կրակի դադարեցման վերաբերյալ առաջարկությունը: Սեպտեմբերի 21–ին Ստեփանակերտի ու Բաքվի ներկայացուցիչները հանդիպեցին Եվլախում, սեպտեմբերի 25–ին` Իվանյանում, սեպտեմբերի 29-ին` կրկին Եվլախում։ Սեպտեմբերի 24-ին սկսվեց արցախցիների բռնի տեղահանումը։
Սեպտեմբերի 28–ին Արցախի նախագահ Սամվել Շահրամանյանը հրամանագիր ստորագրեց, ըստ որի` Արցախի Հանրապետությունը 2024 թվականի հունվարի 1-ից կդադարի գոյություն ունենալ։
Վերջին տվյալներով` ՀՀ–ում Արցախից բռնի տեղահանված 101 848 անձ է հաշվառվել և նույնականացվել։